Prokuroria e Posaçme është dorëzuar pas vitesh hetime ndaj ish-kryetarit të Gjykatës së Lartë të Shqipërisë, Xhezair Zaganjori, duke mos gjetur dot prova për akuzën për “Fshehje të pasurisë”.
Dosja ndaj tij u “kopsit” menjëherë sapo Zaganjori u shkarkua nga detyra në procesin e vettingut, ndërkohë që në publik u pa si një hakmarrje për shkak të vendimeve që ai kishte dhënë ndër vite.
Profesori i drejtësisë, ish-ambasadori i Shqipërisë në Gjermani, autori i disa botimeve ndërkombëtare dhe ish-kryetari i Gjykatës së Lartë, ka arritur të provojë se pasuria e tij ka qenë ajo e deklaruara dhe ai as e kishte fshehur dhe as kishte refuzuar ta deklaronte.
Gjyqtari paraprak ka vlerësuar dosjen e mbërritur nga Prokuroria e Posaçme dhe ka pranuar kërkesën për pushim të hetimeve.
Xhezair Zaganjori, ka qenë një ndër zyrtarët më të lartë të sistemit të drejtësisë në Shqipëri. I zgjedhur në Gjykatën Kushtetuese në vitin 2003 dhe në Gjykatën e Lartë në vitin 2013, ai e kaloi vetingun në shkallë të parë përmes një vendimi të diskutueshëm të trupës gjyqësore me kryetar Olsi Komici, relatore Pamela Qirko dhe anëtar Roland Ilia.
Vendimi i KPK-së u kundërshtua përmes një rekomandimi të ONM-së, i pasuar nga ankimi i Komisionerit Publik, i cili në tetor 2018 i kërkoi Kolegjit shkarkimin e Zaganjorit me argumentin se nuk justifikonte pasurinë dhe nuk kishte paguar tatimet.
Procesi i Zaganjorit në shkallën e dytë të vetingut zgjati 3 seanca dhe u gjykua nga trupa e drejtuar nga Albana Shtylla, me relatore Rezarta Schuetz dhe anëtarë Luan Daci, Sokol Çomo dhe Natasha Mulaj.
Në fund, Kolegji e përmbysi vendimin e KPK-së, duke arritur në përfundimin se kreu i Gjykatës së Lartë nuk arriti të provojë mbulimin me burime të ligjshme për 4 pasuri të patundshme në Tiranë, kishte deklarim të pasaktë të burimit të blerjes së një apartamenti në Durrës si dhe mungesë dokumentimi të pagesës së tatimeve për të ardhurat e përfituara nga qiratë në vitet 1999-2007.
