Shefi i Prokurorisë së Posaçme, Altin Dumani ka qenë sot i pranishëm në një aktivitet të organizuar këtë të hënë nga Komiteti Shqiptar i Helsinkit, me në fokus luftën kundër korrupsionit.
Në fjalën e tij, ai i bëri thirrje shoqërisë civile të bashkojë përpjekjet me SPAK në luftën kundër korrupsionit, duke u shprehur i hapur për bashkëpunim.
“Shoqëria civile është e ftuar të bashkëpunojë me SPAK për tematika të caktuara. Këto analiza i shërbejnë institucionit tonë për përmirësimin e performancës. Jemi të hapur për bashkëpunime të tilla,” tha Dumani.
Në fund të këtij viti, Altin Dumani do të marrë përsipër kompetencat e Komisionerit Publik në KPA, duke zgjeruar në këtë mënyrë përgjegjësitë e SPAK në monitorimin dhe hetimin e zyrtarëve të drejtësisë.
Ai konfirmoi se institucioni që drejton ka aplikuar ligjin anti-mafia për disa persona të shkarkuar nga dëtyra, ku në listë përfshihen gjyqtarë dhe prokurorë.
“Materialet nga procesi administrativ i vetingut i kemi përdorur si indicie për të gjetur prova në hetimin penal. Rezultatet e hetimit administrativ janë një bazë e mirë për të gjetur prova ndaj subjekteve të shkarkuar nga vetingu,” tha kreu i SPAK.
Gjatë fjalës së tij, ai u shpreh se shqetësuese për të nuk janë rastet e ish-gjyqtarëve apo ish-prokurorëve të lënë jashtë sistemit, por problem janë subjektet brenda sistemit, të cilat ende shpërdorojnë detyrën.
“Shqetësimi më i madh nuk janë të shkarkuarit, por ata që janë konfirmuar në detyrë. Ky është fokusi ynë, sepse ata janë ende në sistem dhe mund të kryejnë akte korruptive,” theksoi ai.
