Sot, më 26 nëntor 2025, Shqipëria kujton 6 vjetorin e tërmetit shkatërrues të vitit 2019, me magnitudë 6.4, që goditi në orën 03:54 dhe u ndje deri në Taranto e Beograd. Brenda vetëm 50 sekondash humbën jetën 51 persona, mbi 3,000 të tjerë u plagosën dhe mijëra familje mbetën pa strehë. Durrësi, Thumana dhe Laçi u kthyen në plagë të hapura të dhimbjes kombëtare.
Rreth 1,300 pasgoditje tronditën vendin gjatë ditëve në vijim, duke shtuar frikën dhe duke e bërë edhe më të vështirë punën e ekipeve të kërkim-shpëtimit. Forcat shqiptare, të mbështetura nga SHBA, vendet e Europës, rajoni dhe dhjetëra shtete të tjera, arritën të shpëtojnë shumë jetë nën rrënoja. Fëmijë, të moshuar dhe familje të tëra kaluan netë të tëra në çadra, stadiume, palestra apo në makina.
Qindra godina u shembën në Durrës dhe Thumanë, ndërsa mbi 1,400 ndërtesa në Tiranë dhe rreth 900 në Durrës u dëmtuan rëndë. Mijëra qytetarë u strehuan përkohësisht në hotele, qendra sociale, palestra, si edhe në kampin e ngritur në Kosovë. Ndihma ndërkombëtare mbërriti nga më shumë se 30 shtete — nga Turqia e Greqia deri në SHBA, Itali e Maqedoninë e Veriut — duke sjellë inxhinierë, pajisje, çadra, batanije dhe ekipe shpëtimi.
Edhe pse kanë kaluar vite, shumë familje ende presin rikthimin në një shtëpi të rindërtuar, të bllokuara nga procedurat dhe premtimet e zvarritura. Disa prej tyre kanë jetuar për vite me radhë në hotele apo struktura provizore, duke shpresuar për një normalitet që nuk u rikthye kurrë plotësisht. Sot, Shqipëria përkulet jo vetëm për viktimat e tragjedisë, por edhe për ata që ende presin drejtësinë e strehës së tyre të sigurt.
