Të paktën 92 palestinezë u vranë dhe më shumë se 200 të tjerë u plagosën gjatë dy ditëve të fundit në Gaza ndërsa Izraeli intensifikon operacionet e tij në të gjithë enklavën.
Kryeministri izraelit Benjamin Netanyahu thotë se vendi i tij nuk ka zgjidhje veçse të vijojë të luftojë në Gaza. Sipas tij lufta do të përfundojë vetëm kur të realizohen tre objektivat, shkatërrimi i Hamasit, lirimi i të gjithë pengjeve dhe sigurimi që Hamasi nuk përbën asnjë kërcënim për Izraelin në të ardhmen.
Netanyahu është nën presion në rritje jo vetëm nga familjet e pengjeve dhe mbështetësit e tyre, por edhe nga ushtarët rezervistë dhe pensionistë izraelitë, të cilët vënë në dyshim vazhdimin e luftës pasi Izraeli prishi një armëpushim muajin e kaluar.
Kryeministri izraelit pretendon se Hamasi e refuzoi propozimin e fundit për të liruar gjysmën e pengjeve për një armëpushim të vazhdueshëm.
Që kur Izraeli i dha fund armëpushimit, të ndërmjetësuar nga Katari, Egjipti dhe Shtetet e Bashkuara më 18 mars, sulmet nga ana e shtetit hebre në të gjithë Gazën kanë marrë jetën e rreth 1,800 njerëzve dhe kanë plagosur pothuajse 4,700 të tjerë.
Numri i të vdekurve në Rripin e Gazës është rritur në 51,157, sipas Ministrisë së Shëndetësisë të Gazës, e drejtuar nga Hamasi, e cila nuk bën dallimin midis viktimave civile dhe luftarake. OKB thotë se gratë dhe fëmijët përbënin më shumë se dy të tretat e të gjitha vdekjeve.
