Një ditë pasi paralajmëroi subjektet që kanë zaptuar hapësirat publike me tenda, mushama apo kioska, kryeministri Edi Rama ka publikuar fotot të disa bizneseve nga zona e 21 Dhjetorit në Tiranë.
“Situatë klasike “toke të xanun” në Tiranë, tek 21 Dhjetori”, shkruan Rama, krahas disa fotove nga lokalet dhe bizneset që kanë zënë hapësirat publike me çadra, tavolina e karrige.
Kreu i qerverisë ka paralajmëruar sërish se, “kush nuk do t’i tërheqë vetë nga hapësira publike e përbashkët barrikadat që u ka ngritur njerëzve me gjithëfarësoj objektesh, do të ballafaqohet jo vetëm me gjobat përkatëse po edhe me ndjekjet përkatëse penale”.
Postimi i Ramës
Situatë klasike “toke të xanun” në Tiranë, tek 21 Dhjetori – kush nuk do t’i tërheqë vetë nga hapësira publike e përbashkët barrikadat që u ka ngritur njerëzve me gjithëfarësoj objektesh, që nga tavolinat dhe frigoriferët në trotuarë e deri tek muret apo trarët e “doganave” rreth pallateve, do të ballafaqohet jo vetëm me gjobat përkatëse po edhe me ndjekjet përkatëse penale për shkatërrim të pronës publike, cënim të shëndetit e sigurisë fizike të qytetarëve, krim mjedisor dhe me radhë…
Koha për t’u bërë bashkë që të gjithë në emër të bashkëjetesës në të njëjtën lagje; shumica duke marrë mbrapsht atë që i takon dhe pakica duke kthyer mbrapsht atë që nuk i takon!
