Deputeti i Partisë Socialiste, Erion Braçe ka ironizuar takimin e tij me kryetaren e komanduar të Bashkisë së Tiranës, Anuela Ristani, të cilën e ka akuzuar publikisht më herët për keqmenaxhimin e punëve në krye të kryeqytetit. Teksa poston një foto nga festimet në ditën e Pavarësisë, që u organizuan në sheshin Skënderbej, Braçe ironizon se gëzimi i madh dukej në fytyrën e tij, ndërsa postimin e shoqëron me këngën ‘merr koburen vramë moj, se nuk dua jetë’.
“ISHTE GEZIM I MADH, DUKET! Kishte edhe deshmitare-Lumja, adashi Erjon, Vera dhe … ZOTI!”, shkruan Braçe në postimin e tij në rrjetet sociale.
Në një postim të bërë disa kohë më parë, Braçe e akuzonte Ristanin për arrogancë, për shkak se shqetësimet e tij për komunitetin nuk ishin marrë parasysh nga zyrtarët e bashkisë.
“Kjo është Anuela Ristani, nënkryetarja e Bashkisë ose kryetarja e Bashkisë në detyrë. Më shkruan mua e me thotë: ‘Që të adresosh saktë videon e radhës’. Dhe më dërgon kontaktin e një nënkryetari tjetër bashkie. A thua se ne punojmë për Anuelën…unë punoj për Anuelën dhe ata atje në Selitë ja kanë për borxh Anuelës bezdisjen për problemet e tyre.
Më ka shkruar dje në orën 19:07, ndërkohë që i kam folur Anuelës publikisht diku rreth orës 09:00 të mëngjesit. Dhe jo për hallin tim personal, as për shtëpinë time, as për rrugën time. I kam folur për një situatë emergjence mjedisore që zgjat prej muajsh mu në mes të Selitës, 5 hapa larg nga qendra shëndetësore, 3 hapa larg nga posta dhe 6 hapa larg nga kopshti i papranueshëm i fëmijëve për koshat e plehrave që ka vendosur në mes të tyre, ku dje ishte shtuar edhe një qenush i ngordhur, i vrarë apo i helmuar.
Në derë të qendrës shëndetësore, postës dhe kopshtit të fëmijëve mes lagjes! Ajo që bën përshtypje është arroganca e këtij njeriu, bën ironi me një gjë që ia kam paraqitur si shqetësim që në muajin shkurt në zyrën e saj.
Ia kam përsëritur thuajse javë për javë në telefon, në mesazhe, përsëri në zyrën e saj. Dhe kujt ia bën? Atyre njerëzve aty në Selitë, mua gjithashtu që duhet të bëj fushatë për të mbledhur vota që Anuela të jetë prapë në pushtet. Anuela! Kuptoni? Me këtë kam të bëj e me këtë keni të bëni! Me Anuelën”, shprehej Braçe disa kohë më parë.
Socialisti zbuloi pak ditë më parë dhe mungesën e komunikimit me kryeministrin Edi Rama, për shkak të vendimit të këtij të fundit për shkarkimin e Erion Veliaj nga drejtimi i Bashkisë, pa pritur më parë vendimin e Gjykatës Kushtetuese. /Zeri.ai
