Kombëtarja e Shqipërisë në basketboll për meshkuj fitoi sot pasdite 78-67 në Vienë ndaj Austrisë në ndeshjen e fundit të Grupit C, sfidë e vlefshme për fazën para-eliminatore të Botërorit 2027.
Një fitore disi e papritur, që vjen në sfidën e fundit dhe me Shqipërinë të eliminuar nga ky turne, atëherë kur nuk pritej. Gjithsesi, kuqezinjtë e drejtuar nga trajneri Erkand Karaj bënë një paraqitje shumë të mirë, duke e merituar fitoren.
Ndeshja u komandua thuajse përgjatë gjithë kohës nga Shqipëria, që kryesoi 19-16 në mbyllje të periodës së parë. Ndërsa 20 minutat e para të takimit u mbyllën 35-31 për kuqezinjtë, që nuk e ulin ritmin edhe në vijim.
Basketbollistët shqiptarë ruajnë gjithnjë një epërsi prej 6-7 pikësh, duke mos lejuar vendasit të afrohen. Perioda e tretë mbyllet 57-48 për kuqezinjtë, që arrijnë të përballojnë me suskes presionin e vendasve.
Kështu, krejt takimi mbyllet 78-67 për Shqipërinë, ndeshje ku u dallua Eldi Hysa me 17 pikë, Elvis Dusha me 14 pikë e Manuel Kalanxhi me 13 pikë. Një fitore e rëndësishme për perspektivën e këtij ekipi me mjaft djem të rinj.
Grupi C, ndeshjet e Shqipërisë
Armeni – Shqipëri, 84-79
Shqipëri – Austri, 63-99
Shqipëri – Armeni, 70-91
Austri – Shqipëri, 67-78
Renditja: Austria 7 pikë, Armenia 6 pikë, Shqipëria 5 pikë.
