Barcelona mori një fitore me shije të hidhur ndaj Slavia Pragës (4-2), në një ndeshje me dy tablo të ndryshme. Lajmi i mirë ishte paraqitja e Fermín López, i cili realizoi dopietë dhe mbajti ekipin “në lojë” në momentet kyçe. Por mbrëmja europiane u errësua nga dëmtimi i Pedrit, që ngriti menjëherë alarm në kampin blaugrana.
Mesfushori kanarian pësoi një dëmtim në kofshën e djathtë (hamstring). Situata ndodhi papritur: gjatë një dueli në mesfushë, Pedri kapi pjesën e pasme të kofshës dhe u rrëzua në tokë, duke kuptuar se diçka nuk shkonte.
Në episodin e fundit të “El Bar de Sique”, gazetari Santi Ovalle shpjegoi se, sipas njerëzve pranë lojtarit, ka një rreze shprese: dëmtimi mund të jetë më pak i rëndë sesa u duk fillimisht dhe rikuperimi mund të zgjasë 2–3 javë. Megjithatë, ai theksoi se parashikimi i saktë do të jepet vetëm pas ekzaminimeve, ku pritet të kryhet një kontroll për të parë madhësinë e dëmtimit.
Ovalle përshkroi edhe gjendjen emocionale të Pedrit pas ndeshjes, duke thënë se ai ishte i mërzitur dhe i shqetësuar, pasi i frikësohet rikthimit të problemeve të shpeshta fizike që e kanë ndjekur kohët e fundit.
Edhe trajneri Hansi Flick nuk u shfaq optimist pas sfidës: ai tha se Pedri ka një problem muskulor dhe duhet të bëjë testet, ndërsa e cilësoi situatën si “jo lajm të mirë”.
Në pritje të analizave mjekësore, sinjalet janë që Pedri mund të mungojë të paktën në ndeshjen e radhës në kampionat ndaj Real Oviedo dhe në çerekfinalen e Kupës së Mbretit ndaj Albacete në “Carlos Belmonte”.
