Në përgjigje të situatës së krijuar nga shpërthimi në Zubin Potok, Korporata Energjetike e Shqipërisë ka nisur që nga mëngjesi i sotëm furnizimin me energji elektrike për Korporatën Energjetike të Kosovës. Kjo masë synon të ndihmojë Kosovën në përballimin e problemeve me prodhimin e energjisë.
Sipas ReportTV, KESH ka konfirmuar se do të vazhdojë të ofrojë energji edhe në ditët në vijim, nëse do të jetë e nevojshme.
Ndërkohë, Ministri i Brendshëm i Kosovës, Xhelal Sveçla, në një konferencë urgjente njoftoi se deri tani janë arrestuar tetë persona të dyshuar për përfshirje në shpërthimin në kanalin Ibër-Lepenc. Operacioni për arrestimet u zhvillua në dhjetë lokacione të ndryshme, ku autoritetet konfiskuan armë, municione dhe eksploziv, duke i cilësuar këto si prova që lidhen me aktin terrorist.
Sveçla akuzoi Serbinë për përfshirje të drejtpërdrejtë në këtë sulm, duke theksuar se të arrestuarit kanë lidhje me autoritetet zyrtare të Beogradit. Ai e cilësoi këtë si një përpjekje të vazhdueshme për destabilizimin e situatës në veri të Kosovës.
