Një shpërthim është dëgjuar pasditen e sotme pranë burgut të Fushë-Krujës, duke shkaktuar panik në zonë. Menjëherë pas ngjarjes, forca të shumta policore kanë mbërritur në vendngjarje për të kryer verifikimet e nevojshme.
Sipas raportimeve nga gazetari i News24, Igli Çelmeta, dyshohet se shpërthimi është shkaktuar nga një gjenerator, i cili fillimisht ka marrë flakë. Më pas, mendohet se ka plasur depozita e karburantit të tij, duke shkaktuar zhurmën e fortë të dëgjuar nga banorët përreth dhe personeli i burgut.
Në vendin e ngjarjes janë të pranishëm oficerë nga Policia e Tiranës dhe ekspertë të zjarrfikëses, të cilët po punojnë për të përcaktuar me saktësi shkaqet e shpërthimit dhe për të vlerësuar nëse ka ndonjë dëm material apo të lënduar.
Deri më tani, nuk raportohet për viktima apo persona të plagosur, por pritet një njoftim zyrtar nga autoritetet për të dhënë më shumë detaje rreth ngjarjes. Hetimet po vijojnë për të sqaruar plotësisht rrethanat e incidentit.
