Futbolli është sport me plot surpriza, disa prej tyre janë shumë të bukura dhe disa të tjera të trishtuara. E tillë është edhe ajo e Luka Jovic, e sulmuesit që pak vite më parë të gjithë mendonin se e priste një e ardhme e ndritur, por tani po jeton një të tashme të errët.
Emri i Luka Jovic, u bë një nga më të rëndësishmit në futbollin evropian kur sulmuesi serb shkëlqeu me Eintracht Frankfurt, ku shënoi 40 gola në 93 ndeshje. Aftësia e tij për të shënuar gola në çdo mënyrë të mundshme tërhoqi vëmendjen e disa prej klubeve më të mëdha në Europë dhe në fund, ishte Real Madrid që siguroi transferimin e tij për një shifër prej 63 milionë eurosh në korrikun e vitit 2019.
E ardhmja e sulmuesit dukej premtuese dhe ardhja e tij në Santiago Bernabeu pritej të ishte fillimi i një karriere të mahnitshme. Megjithatë, përkundër pritshmërive të mëdha, aventura e tij në Madrid nuk mori kurrë hov dhe rezultoi një zhgënjim i madh.
Dy sezonet te Real-i ishin sfiduese për Jovic, i cili nuk arriti të gjente ritmin dhe qëndrueshmërinë që pritej nga një lojtar i kalibrit të tij. Midis dëmtimeve, konkurrencës së brendshme dhe mungesës së përshtatjes me stilin e lojës, të gjitha këto ishin fillim që paralajmëronin tatëpjetën në karrierën e tij. Në 51 ndeshje të aktivizuara me Real-in, shënoi vetëm 3 gola.
Pas dështimit te Real-i, u rikthye në huazim aty ku shkëlqeu, tek Eintracht Frankufurt, por “trauma” që kishte pësuar në Madrid e kishte lënë me “pasoja” dhe nuk arriti dot të kapte formën e dikurshme.
Më pas erdhi erdhi transferimi në Serie A, fillimisht te Fiorentina dhe më pas huazimi te Milan, por sërish pa lënë gjurmë.
E ardhmja e Luka Jovic është e pasigurt, realiteti është se karriera e tij ka pësuar një goditje që vështirë të kapërcehet. Sulmuesi serb është shumë pranë transferimit te Monza, që është drejt rënies në Serie B, por Jovic i konsideruar dikur si “ylli i Ballkanit” shpreson të gjejë pak “dritë” pas gjithë “errësirës” që ka pasur vitet e fundit.
