Në një intervistë për SYRI TV, anëtari i Këshillit Bashkiak të Tiranës, Ilir Alimehmeti, komentoi vendimin për shkarkimin e kryebashkiakut Erion Veliaj, duke e cilësuar si një hap pozitiv, por duke theksuar se sfidat për qytetin mbeten.
“Ky është një zhvillim i mirë, një zhvillim pozitiv, por kjo u bë me dorën e kryearkitektit të kapjes, abuzimit dhe uzurpimit të Tiranës, që është Edi Rama. Mastermindi është akoma aty, dhe çlirimi do të ndodhë kur të largohet Edi Rama,” deklaroi Alimehmeti.
Ai shtoi se largimi i Veliajt është i domosdoshëm, pasi pasardhësit e tij në Këshill Bashkiak dhe drejtori të ndryshëm janë ende të lidhur me njerëzit e ngushtë të kryebashkiakut, por tani janë më të tërhequr. “Kush i përdori ata? I përdori Edi Rama, i cili u soll si diktator dhe autokrat,” tha ai, duke kritikuar mënyrën e menaxhimit të Këshillit Bashkiak.
Alimehmeti theksoi gjithashtu se disa procedura nuk janë ndjekur si duhet, duke nënkuptuar se kjo mund të ketë ndodhur qëllimisht për t’i lënë hapësirë Veliajt. Ai kujtoi gjithashtu rolin e anëtarëve të Këshillit në miratimin e vendimeve të Veliajt:
“Veliaj është aty ku është për shkak të dëmeve që ka shkaktuar, veçanërisht në fushën financiare. Ju që ishit pjesë e Këshillit Bashkiak keni miratuar gjithçka, nga buxhetet te inceneratori dhe vjedhjet. Ai është kapitull i mbyllur, por ju jeni kapitull i hapur.”
Në fund, Alimehmeti kritikoi edhe veprimet e anëtarëve të Këshillit gjatë betimit dhe protestave para SPAK, duke theksuar se ato nuk shërbejnë për respektimin e përgjegjësive institucionale.
