Reshjet e vazhdueshme të ditëve të fundit kanë sjellë probleme të mëdha në disa zona të Bashkisë Devoll, duke dëmtuar infrastrukturën dhe vështirësuar qarkullimin. Sipas njoftimit zyrtar, strukturat vendore janë në gatishmëri dhe po monitorojnë situatën në terren.
Në fshatin Arzë, ura kryesore është bërë e pakalueshme për mjete, ndërsa trotuari që lidh dy lagjet ka pësuar çarje, rrezikshmëri për lëvizjen e banorëve. Janë marrë masa për devijimin e trafikut dhe sigurimin e zonës. Në Njësinë Administrative Hocisht, disa sipërfaqe bujqësore kanë përfunduar të përmbyten, ndërsa rrugët e Stropanit dhe Grapshit kanë pësuar rrëshqitje dheu, duke vështirësuar qarkullimin. Ekipet e bashkisë janë angazhuar për pastrimin e këtyre segmenteve.
Situata është kritike edhe në fshatin Pilur, ku rrëshqitjet e dheut kanë bllokuar rrugët dhe ujë është depërtuar në disa banesa. Grupi i emergjencave dhe ekipet e ndërhyrjes së shpejtë po merren me zhbllokimin dhe normalizimin e situatës. Në Proger, uji ka dalë në nivelin e rrugës kryesore, duke penguar lëvizjen e banorëve.
Gjithashtu, shkarjet dhe rëniet e gurëve janë evidentuar në rrugën Miras–Arrëz, duke penguar më tej qarkullimin. Bashkia Devoll konfirmon se të gjitha strukturat janë të gatshme për menaxhimin e situatës, zhbllokimin e akseve dhe mbrojtjen e banorëve. Shtabi i Emergjencave Civile po monitoron vazhdimisht zonat e prekura.
Autoritetet apelojnë qytetarët të tregojnë kujdes dhe të shmangin lëvizjet në zona me rrezik, si dhe të raportojnë çdo problem në strukturat përkatëse. Në Qafë Plloçë, prania e inerteve ka shtuar rrezikun në rrugë, madje edhe në aksin e ri Qukës-Qafë Plloçë janë evidentuar lëvizje të lehta të dheut, me ndërhyrje të punonjësve që vazhdojnë të punojnë në terren.
