Në orën 10:00 të kësaj të enjteje, 400 anëtarët e asamblesë kombëtare socialiste do të mblidhen në Pallatin e Kongreseve.
Kryesocialisti Edi Rama do të prezantojë me detaje programin qeverisës për katër vitet e ardhshme, duke synuar gjithashtu të ulë çdo eufori që mund të vijë pas fitores së mandatit të katërt më 11 Maj.
Pavarësisht spekulimeve të shumta rreth emrave për kandidatët e mundshëm në kabinetin e tij të katërt, Rama ka arritur të ruajë sekretet rreth formacionit të tij.
Mëngjesin e sotëm, ai publikoi një foto nga zyra e Kryeministrisë me mbishkrimin “Mirmëngjes, shihemi në orën 11”, duke paralajmëruar se do të ketë takime intensive për të diskutuar për bashkëpunëtorët më të ngushtë në qeveri, përfshirë pozitat kyçe si numri dy i qeverisë dhe drejtimi i parlamentit.
Një ditë pas kësaj mbledhjeje, të premten, deputetët socialistë dhe ata të opozitës do ti drejtohen parlamentit për të bërë betimin.
Kjo seancë konstituive do të drejtohet nga një mjek tjetër, Vasil Lajo, pasi Sali Berisha, lideri i opozitës, ka refuzuar rolin e drejtuesit të seancës.
Lajo është një emër i ri në grupin parlamentar socialist dhe do të shërbejë për një periudhë të shkurtër në krye të parlamentit gjatë kësaj seance.
