Presidenti i Shteteve të Bashkuara, Donald Trump, përmes një postimi në platformën Truth Social, u shpreh se SHBA-të janë të gatshme të ndërhyjnë për të mbrojtur demonstruesit paqësorë në Iran, nëse autoritetet iraniane hapin zjarr ndaj tyre dhe ka viktima.
Demonstratat anti-rritje çmimesh në Iran kanë shkaktuar tashmë të paktën gjashtë të vdekur dhe qindra të plagosur në disa qytete, përfshirë Lorndegan, Azna dhe Kuhndasht, ku disa demonstrues kanë përplasur objekte dhe forcat e sigurisë kanë përdorur gaz lotsjellës dhe kanë kryer arrestime.
“Nëse Irani qëllon dhe vret me dhunë protestuesit paqësorë, gjë që është zakon i tyre, Shtetet e Bashkuara të Amerikës do t’i ndihmojnë. Jemi të armatosur dhe gati për të filluar. Faleminderit për vëmendjen tuaj ndaj kësaj çështjeje! President DONALD J.TRUMP”, tha ai.
Një nga viktimat e identifikuara është 21-vjeçari nga Basij, pjesë e forcave të sigurisë, ndërsa raportohet se gjatë përleshjeve janë plagosur edhe 13 anëtarë të Policisë dhe Basij. Demonstratat e tanishme janë më të vogla se ato masive të vitit 2022, që shpërthyen pas vdekjes së Mahsa Aminit dhe kishin shkaktuar qindra viktima.
Këto zhvillime vijnë ndërsa Trump paralajmëron për ndërhyrje të mundshme, duke shtuar tensionet ndërkombëtare mbi mënyrën e trajtimit të protestuesve në Iran.
