Gianni Infantino ka ndezur debat në Itali pas një shakaje për mungesën e “Azzurrëve” në Kupën e Botës.
Sipas La Gazzetta dello Sport, presidenti i FIFA-s foli gjatë natës hapëse të Botërorit, pas ndeshjes Meksikë-Afrikë e Jugut, dhe komentoi formatin e ri me 48 skuadra.
“Le të shohim si do të funksionojë ky Botëror me 48 ekipe. Është një turne shumë i madh”, u shpreh Infantino.
Më pas, ai foli edhe për idenë e një Botërori me 64 skuadra, një temë që është diskutuar më parë në FIFA.
“Kemi folur edhe për 64 skuadra, për ta përfshirë edhe më shumë botën e futbollit. Ndoshta me 64 skuadra Italia do të kualifikohej. Mund të shkojmë deri në 228 dhe të shohim nëse ia dalim”, tha Infantino me ironi.
Kjo deklaratë shkaktoi reagime të forta në Itali, pasi kombëtarja italiane mungon sërish në fazën finale të Kupës së Botës. Një nga reagimet më të ashpra erdhi nga deputeti Gaetano Amato, i cili kritikoi presidentin e FIFA-s për mënyrën si foli.
“Infantino nuk po flet si një tifoz në lokal, por si president i FIFA-s. Ky rol kërkon ekuilibër, respekt dhe përgjegjësi institucionale”, u shpreh Amato.
Ai shtoi se italianët janë të parët që ndihen të zhgënjyer për rënien e kombëtares dhe nuk kanë nevojë për batuta nga kreu i futbollit botëror.
Përtej polemikave, ideja e një Botërori me 64 skuadra mbetet ende në sfond. FIFA ka shqyrtuar më parë një format të tillë, por për momentin fokusi është te edicioni aktual me 48 kombëtare.
