Çdo prind kërkon të krijojë një mjedis të sigurt dhe mbështetës, ku fëmija të mund të rritet dhe të jetë i lumtur. Por çfarë e përcakton realisht një shtëpi të lumtur? A mjafton mungesa e konflikteve?
“Shtëpia e lumtur nuk bazohet vetëm te rehatia materiale apo siguria,” shpjegon Dr. Sasha Hall, psikologe e fëmijëve. Sipas saj, lumturia familjare nuk varet nga lodrat, rrobat apo teknologjia, por nga dashuria, kufijtë e qartë dhe rutinat e qëndrueshme.
Në bashkëpunim me Dr. Stewart Pisecco, psikolog dhe drejtor i klinikës Pisecco & Associates, ata rendisin shenjat kryesore që tregojnë se fëmijët po rriten në një shtëpi të lumtur.
Dashuri pa kushte
“Fëmijët duhet të ndihen të sigurt se dashuria nuk varet nga sjellja e tyre,” thekson Dr. Hall. Siguria emocionale u jep atyre lirinë të shprehin ndjenjat, të bëjnë gabime dhe të kuptojnë se marrëdhëniet mund të riparohen pas konflikteve.
Prindërit këshillohen të shmangin fraza si: ‘Nëse e bën këtë, nuk do të të dua’, në mënyrë që fëmija të kuptojë se dashuria mbetet e pandryshueshme, edhe kur ka kufij.
Kufij të qartë dhe të qëndrueshëm
“Është normale që fëmijët të testojnë kufijtë,” shpjegon Dr. Pisecco. Ai këshillon prindërit të kenë një reagim të planifikuar dhe të jenë të qëndrueshëm në zbatimin e rregullave.
“Kjo krijon ndjenjën e parashikueshmërisë dhe i ndihmon prindërit të qëndrojnë të qetë edhe në momentet e kaosit,” shton ai.
Prindërit si shembull në menaxhimin e emocioneve
Studimet tregojnë se, ndonëse prindërimi është përjetim i kënaqshëm për të dy prindërit, nënat raportojnë më shpesh lodhje dhe stres. Megjithatë, mënyra se si prindërit menaxhojnë emocionet e tyre ndikon drejtpërdrejt tek fëmijët.
“Prindërit janë spiranca emocionale e familjes,” shpjegon Dr. Hall. Kur të rriturit janë të qetë dhe të balancuar, edhe fëmijët ndihen më të sigurt.
Rutinë e përditshme dhe parashikueshmëri
Fëmijët lulëzojnë kur dita e tyre ka struktura të njohura. Orët e qëndrueshme të ushqimit, gjumit apo aktiviteteve i ndihmojnë të ndihen të sigurt dhe ulin ankthin.
“Krijoni hapësira për gjërat, jo grumbuj rrëmuje,” sugjeron Dr. Pisecco, duke theksuar se rendi ndihmon në krijimin e një ndjenje stabiliteti.
Lavdëroni sjelljet pozitive
Njohja e sjelljeve të mira i përforcon ato. “Mos thoni vetëm ‘bravo’, por duhet të keni më konkretë,” këshillon Dr. Pisecco. Për shembull: ‘Bravo që e vendose çantën në vendin e saj kur u ktheve nga shkolla’.
Krijoni kujtime që zgjasin
Koha cilësore mes prindit dhe fëmijës është thelbësore. Aktivitetet duhet të udhëhiqen nga interesi i fëmijës dhe jo të kthehen në mësim apo detyrim.
“Shtëpitë e lumtura ndërtohen mbi përvoja të përbashkëta,” shton Dr. Hall. Ato mund të jenë vakte familjare, tregime para gjumit, hobi të përbashkëta apo biseda të thjeshta. Ndjenja e lidhjes dhe kuptimit të përbashkët është në qendër të një shtëpie të lumtur.
