Sekretari i Këshillit Bashkiak të Tiranës i është drejtuar me një letër kryetarit të bashkisë, Erion Veliaj, ku sqaron se nga ana e institucionit që ai përfaqëson nuk është marrë asnjë vendim që ndalon pjesëmarrjen apo prezencën e tij në mbledhjen e sotme të Këshillit, ku pritet shkarkimi i Veliajt.
Sekretari Behar Zeneli shkruan në letër se Veliajt nuk i ndalohet pjesëmarrja në mbledhjen e sotme, por në rast pamundësie kundërshtitë e tij për shkarkimin mund t’i dërgojë me shkrim.
Të premten, Veliaj i drejtoi një letër zyrtare Këshillit, ku kërkonte të merrte pjesë në mbledhjen e së hënës, ku do të shqyrtohet propozimi për shkarkimin e tij nga detyra.
Sekretari i Këshillit Bashkiak, Behar Zeneli, iu përgjigj duke i sugjeruar se, në rast se nuk mund të jetë fizikisht i pranishëm, pretendimet e tij mund t’i paraqesë me shkrim. Veliaj reagoi menjëherë, duke i kujtuar sekretarit se nuk ka të drejtë të marrë vendime në emër të një organi kolegjial, pasi roli i tij është thjesht administrativ.
Ndërkohë, sot, Komisioni i Çështjeve Ligjore i Këshillit Bashkiak të Tiranës ka marrë vendimin për të refuzuar kërkesën e Veliajt për të qenë i pranishëm në mbledhje. Ajo që ka tërhequr vëmendje është se edhe këshilltarët e Partisë Socialiste, forca që propozoi shkarkimin e tij, votuan kundër pranisë së Veliajt në mbledhje.
