Real Madrid vazhdon të punojë për përforcimin e mbrojtjes dhe një nga emrat që ka dalë sërish në skenë është Nico Schlotterbeck.
Mbrojtësi gjerman i Borussia Dortmund është ndjekur prej kohësh nga klubi madrilen, ndërsa situata e tij kontraktuale e bën transferimin më të mundshëm. Schlotterbeck rinovoi me Dortmund në prill, por në marrëveshjen e re është përfshirë një klauzolë largimi prej 50 milionë eurosh.
Te Real Madrid e dinë se çdo lëvizje duhet bërë me kujdes, pasi klubi nuk dëshiron të krijojë tensione me Borussia Dortmund. Megjithatë, ekzistenca e klauzolës e bën operacionin më të thjeshtë, nëse madrilenët vendosin të avancojnë.
Sipas raportimeve, vetë Schlotterbeck është në dijeni të interesimit të Real Madrid dhe pret një sinjal konkret nga “Los Blancos”. Mbrojtësi shihet si një profil që i përshtatet ideve të José Mourinhos, për shkak të eksperiencës, forcës fizike dhe qetësisë në lojë.
Ndërkohë, Dortmund po lëviz në merkato për të gjetur një qendërmbrojtës të majtë, çka mund të jetë një shenjë se klubi gjerman po përgatitet për një largim të mundshëm.
Real Madrid dëshiron ta nisë fazën përgatitore me skuadrën sa më të kompletuar, ndaj javët e ardhshme pritet të jenë vendimtare si për afrimet, ashtu edhe për largimet.
