Ishulli i Santorinit po braktiset masivisht nga vendasit e vizitorët pas fenomenit të rrallë që ka goditur vendin.
Aktiviteti sizmik i vazhdueshëm dhe intensiv, ka krijuar radhë të gjata në portin e Santorinit dhe në aeroport teksa kompanitë ajrore e detare kanë dyfishuar oraret e fluturimeve e lundrimeve, ndërsa qindra të tjerë vijojnë të kalojnë natën në makina. Sipas përllogaritjeve të autoriteteve, deri më tani rreth 6000-9000 banorë dhe turistë, mes tyre dhe shqiptarë, janë larguar nga ishulli.
Vetëm në 3 ditët e fundit, janë regjistruar rreth 555 tërmete, më i fuqishmi ka qenë me magnitudë 4.9 Rihter i regjistruar të hënën, ndërsa sot në mëngjes dy lëkundje të shkallës 4.7 dhe 4.8 Rihter kanë goditur vendin. Përveç tërmeteve, janë raportuar edhe rrëshqitje dheu dhe shkëmbinjsh.
Ndërkohë kreu i Organizatës së Planifikimit dhe Mbrojtjes nga Tërmeti, Efthymios Lekkas deklaroi se: Ky aktivitet sizmik nuk do të pushojë në ditët në vijim, do të vazhdojë edhe për disa ditë, ndoshta edhe disa javë, duke qenë se kemi të bëjmë me një proces jashtëzakonisht kompleks të evolucionit të fenomenit. Sizmologët janë konfuzë pasi ende nuk është regjistruar një tërmet i madh që të zhbllokohet gjithë energjia e akumuluar.
E ashtuquajtura breshëria e tërmeteve ka epiqendër zonën detar E 30 km në verilindje të Santorinit, fakt që shihet si pozitiv sepse ndodhet larg vullkanit të ishullit. Por nga ana tjetër mund të aktivizojë një prej pllakave tektonike që sollën tërmetin e madh prej 7.7 Rihter me 55 viktima në vitin 1956. Gjithashtu një prej skenarëve të tejskajshëm dhe thuajse të pamundur është edhe aktivizimi i një prej vullkaneve nënujorë, Kolumbos.
Autoritetet vendase kanë urdhëruar gjithashtu mbylljen e shkollave përgjatë gjithë javës si dhe pezullimin e disa aktiviteteve të tjera jetësore, masa këto të cilët do të shtrihen në 9 ishujt përreth.
Forcat e ndërhyrjes së shpejtë në rast katastrofash kanë marrë masat për çdo fatkeqësi që mund të prekë vendin, të cilët kanë sjellë çadra për strehim, gjeneratorë dhe materiale të tjera të nevojshme. Ndërkohë banorët e ishullit si dhe vizitorët janë këshilluar vazhdimisht për të ndjekur protokollet e sigurisë dhe udhëzimet e autoriteve lokale në raste rreziku.
