Ish-sulmuesi i Manchester United, Wayne Rooney, thotë se trajneri i Liverpool-it, Arne Slot, duhet ta lërë Mohamed Salah në stol, duke theksuar se egjiptiani nuk po kontribuon mjaftueshëm, sidomos në fazën defensive.
Humbja 3–0 ndaj Nottingham Forest ishte një tjetër ndeshje ku Salah, i cili ka pesë gola këtë sezon, nuk arriti të regjistronte gol apo asist.
“Nëse do të isha në vend të Slot, do të merrja një vendim të madh që të ndikonte te pjesa tjetër e skuadrës,” tha Rooney në podcast-in e tij.
“Salah nuk po i ndihmon në mbrojtje.
Nëse je një nga lojtarët e rinj që Liverpool ka blerë dhe je në stol, ndërsa e sheh atë që nuk vrapon… edhe pse është legjendë e klubit, çfarë mesazhi të jep kjo ty?”
33-vjeçari Salah sezonin e kaluar u bë lojtari i parë në historinë e Premier League që e mbylli kampionatin si lojtari me më shumë gola, më shumë asiste dhe si lojtari i sezonit.
Forma e tij brillante përkoi me sezonin e parë të suksesshëm të Arne Slot, i cili e udhëhoqi Liverpool-in drejt titullit pas largimit të Jurgen Klopp.
Megjithatë, pavarësisht një vere me investime të mëdha – ku përfshihen Florian Wirtz dhe Alexander Isak për 241 milionë paund në total – Liverpool ka hasur vështirësi të mëdha.
Aktualisht, të kuqtë renditen në vendin e 11-të me vetëm 18 pikë nga 12 ndeshje.
“Ata po kalojnë një periudhë shumë të vështirë,” shtoi Rooney.
“Dhe padyshim që rasti tragjik me Jotën ka ndikuar te skuadra. Janë shokë të tij. Por kjo nuk është justifikim për mungesën e luftës dhe angazhimit.”
“Emri i Klopp rikthehet vazhdimisht”
Kapiteni Virgil van Dijk deklaroi pas humbjes së fundit se “çdokush duhet të marrë përgjegjësinë”. Me vetëm një fitore në shtatë ndeshjet e fundit të kampionatit, hija e Klopp po e ndjek gjithnjë e më shumë Arne Slot.
“Slot ka një detyrë të madhe për t’i rikthyer te loja dhe te fitoret,” tha Rooney.
“Dhe problemi është që, sa herë që rezultatet janë të dobëta, emri i Klopp rikthehet sërish.
Ashtu si tek United pas Sir Alex Ferguson – çdo trajner krahasohej me të.”
“Fansat e Liverpool-it duhet të heqin dorë nga krahasimi i vazhdueshëm me Klopp dhe të mbështesin Slot-in.”
