Sekretari i Përgjithshëm i NATO-s, Mark Rutte, pritet të bëjë thirrje për një rritje prej 400% të aftësive ajrore dhe raketore të NATO -s, kryesisht për t’iu kundërvënë Rusisë “e cila mbjell terror në qiell”, gjatë një fjalimi në Londër sot.
“Ne duhet të bëjmë një hap përpara në mbrojtjen tonë të përbashkët. Është fakt që rreziku nuk do të zhduket, edhe me fundin e luftës në Ukrainë”, pritet të thotë Rutte gjatë një konference në Chatham House, sipas një deklarate nga zyra e tij.
Për të ruajtur një aftësi të besueshme parandaluese dhe mbrojtëse, “NATO-s i duhet një rritje prej 400% e mbrojtjes së saj ajrore dhe raketore”, do të shtojë sekretari i përgjithshëm përpara samitit të NATO-s në Hagë më 24 dhe 25 qershor.
“Ne shohim në Ukrainë se si Rusia po mbjell terror nga qielli, kështu që do të forcojmë mburojën që mbron hapësirën tonë ajrore”, do të theksojë Rutte, i cili do të takohet edhe me kryeministrin britanik Keir Starmer në Downing Street sot.
Apeli i Rutte vjen në një kohë kur Presidenti i SHBA-së Donald Trump po kërkon që aleatët evropianë të SHBA-së dhe Kanadaja të angazhohen për të shpenzuar të paktën 5% të PBB-së së tyre për mbrojtjen, duke kërcënuar se përndryshe Uashingtoni nuk do të garantojë më sigurinë e tyre.
Sekretari i Mbrojtjes i SHBA-së, Pete Hegseth, tha të enjten në Bruksel se aleatët janë pranë një marrëveshjeje për këtë qëllim, i cili mund të formalizohet në samitin e Hagës.
Mark Rutte po u propozon udhëheqësve të NATO-s “një plan gjithëpërfshirës investimi që do të arrinte në 5% të PBB-së në investime në mbrojtje”.
Në të njëjtën kohë, ai do të thotë sot se forcat e armatosura të vendeve të NATO-s “kanë nevojë për mijëra automjete dhe tanke të tjera të blinduara dhe miliona predha artilerie”.
Nga ana tjetër, Rutte do të mirëpresë strategjinë e re të mbrojtjes së Britanisë, e cila u prezantua një javë më parë dhe e cila, sipas tij, “do të forcojë mbrojtjen e përbashkët të NATO-s”.
