Gjatë dëshmisë së tij në Hagë, James Rubin, ish-ndihmës sekretar amerikan i Shtetit, ka paraqitur akuza të rënda ndaj forcave serbe, që sipas tij, kanë tentuar të mbulojnë krimet e tyre gjatë luftës në Kosovë duke fshehur prova. Ai theksoi se këto forca kanë operuar jo si ushtarë konvencionalë, por si kriminelë duke u përpjekur t’i hedhin fajin UÇK-së për veprat e tyre. Rubin e ndërlidh këtë qasje me ngjarjet që kanë ndodhur më parë në Bosnjë, duke theksuar se Serbia ka përdorur një strategji të ngjashme në të dyja rastet.
Ai tregoi se gjatë një takimi në Bruksel me Jakup Krasniqin, i është kërkuar ndërhyrja ushtarake e ShBA-së dhe armatosja e UÇK-së për të ndaluar spastrimin etnik nga regjimi i Slobodan Millosheviçit. Sipas Rubin, kërkesat e Krasniqit ishin racionale, por në atë periudhë, zgjidhjet e tilla ishin të pamundura.
Dëshmia e tij u zhvillua në Dhomat e Specializuara të Kosovës, ku ishin të pranishme dy përfaqësuese të qeverisë amerikane, Terra Gerhersanem dhe Joana Corner. Teksa dëshmia po zhvillohej, përfaqësueset e SHBA-së ndërhynë për të shprehur shqetësime sa i përket informacioneve që Rubin po jepte lidhur me burimet dhe përfundimet që ishin nxjerrë nga brenda qeverisë amerikane, sidomos ato të inteligjencës.
Në këtë kontekst, Corner theksoi se ndërhyrjet e tyre do të ishin të kufizuara dhe do të ndodhnin vetëm në raste të nevojshme, duke u përpjekur të ruajnë integritetin e procedurave ligjore. Rubin e përfundoi dëshminë e tij, përpara se prokuroria të merrte radhën për pyetje shtesë. Kjo dëshmi është një pjesë e rëndësishme e procesit gjyqësor në lidhje me ngjarjet e luftës në Kosovë dhe krimet e luftës që kanë ndodhur gjatë asaj periudhe, dhe do të luajë një rol kritik në ndriçimin e saj.
