Një avion i vogël u rrëzua dje në një fabrikë çeliku në Salzgitter, në pjesën veriore të Gjermanisë, duke i marrë jetën pilotit dhe bashkpilotit.
Avioni u ngrit nga fusha ajrore në Salzgitter-Drutte dhe pas një fluturimi të shkurtër u përplas në fabrikën e çelikut në Salzgitter, tha një zëdhënës i brigadës së zjarrfikësve.
Shkaku i saktë i përplasjes fillimisht nuk ishte i qart, megjithatë një zëdhënës i policisë theksoi se incidenti është trajtuar si një aksident.
Avioni ra në një zonë të ngushtë midis dy sallave të fabrikës dhe shpërtheu në flakë, tha Arno Sicks, menaxheri operativ i brigadës së zjarrfikësve. Ai përshkroi pamjen e vendit të ngjarjes si një “kornizë çeliku të djegur”, ku vetëm pjesë të krahëve të avionit mund të shiheshin përmes tymit të dendur.
Pavarësisht nga dëmet e shkaktuara nga rrëzimi, një zëdhënës i kompanisë Salzgitter njoftoi se dëmet në ambientet e fabrikës ishin të kufizuara dhe prodhimi nuk ishte prekur.
