Nga inspektimi i avionit të pasagjerëve Jeju Air, disa orë para se të rrëzohej në Korenë e Jugutv duke vrarë 179 perosna, nuk konstatoi asnjë problem, tha linja ajrore.
“Asgjë anormale nuk u vu re në pajisjen e uljes,” tha CEO i linjës ajrore Kim Yi-bae në një konferencë shtypi në Seul, ndërsa hetimet vazhdojnë përse rrotat nuk ishin ulur kur avioni bëri ulje emergjente.
Avioni po udhëtonte nga Bangkok kur u ul në aeroportin ndërkombëtar Muan të dielën, duke shpërthyer në flakë dhe duke vrarë të gjithë personat në bord, me përjashtim të dy anëtarëve të ekuipazhit.
Hetuesit janë ende duke punuar për të identifikuar viktimat dhe për të përcaktuar se çfarë e shkaktoi aksidentin ajror më vdekjeprurës ndonjëherë të Koresë së Jugut.
Shumë pyetje mbeten pa përgjigje dhe hetuesit po shikojnë rolin që mund të ketë luajtur goditja e shpendëve ose kushtet e motit.
Ata po përqendrohen gjithashtu në arsyen pse Boeing 737-800 nuk i kishte ulur rrotat e uljes kur u përplas në pistë pak pas orës 09:00 me kohën lokale (00:00 GMT) të dielën.
Qindra të afërm të pikëlluar kanë ngritur kampin në aeroportin në Muan, të zemëruar që nuk i kanë parë ende trupat e të dashurve të tyre.
Deri më tani, vetëm disa nga eshtrat e viktimave u janë dhënë familjeve të tyre. Të martën, katër u transportuan në shtëpitë e funeralit, por shumica e familjeve të tjera ende presin që të dashurit e tyre të identifikohen.
