Policia e Shtetit ka arritur të zbardhë një ngjarje të rëndë të regjistruar mu në zemër të kryeqytetit, Tiranës. Përmes një njoftimi zyrtar, blutë bëjnë me dije se pesë persona rrëmbyen dhe mbajtën peng një 68-vjeçar, Edvar Agalliu.
Konkretisht më datën 29 prill, pra një ditë më parë, Policia u njoftua se në rrugën “George W Bush” një shtetas ishte marrë me forcë dhe në këmbim të lirisë së atij, ata i kishin marrë një shumë të madhe parash bashkëshortes së 68-vjeçarit.
Nga hetimet, pamjet filmike dhe provat e siguruara ka rezultuar se shtetasit Sulejman Sina, Klinton Sina dhe Idajet Mashollari, në rrugën “George W. Bush”, kanë marrë me forcë në një automjet dhe e kanë mbajtur peng, në një banesë të braktisur në fshatin Kakunjë, Edvar Agalliun, 68 vjeç.
Më pas, ata kanë telefonuar bashkëshorten e të moshuarit, të cilën e kanë shantazhuar për jetën e 68-vjeçarit, duke i kërkuar shumën prej 2 000 000 lekësh. Kjo shumë i është dorëzuar shtetasit Bajram Ibraliut, në zonën e Saukut.
Falë ndërhyrjes së shpejt policia bëri të mundur arrestimin e shtetasve të lartpërmendur, ndërkohë që gjatë kontrolleve në banesat e tyre si dhe në një automjet më të cilin lëviznin Sulejman Sina dhe Nikoleta Begolli, u gjetën dhe sekuestruan 1 746 000 lekë të dyshuara të marra nëpërmjet kanosjes, nga bashkëshortja e Agalliut.
Njoftimi i plotë i Policisë:
Tiranë/Finalizohet operacioni policor i koduar “Imediat”.
Morën me forcë dhe mbajtën peng në një zonë periferike, një 68-vjeçar, si dhe kërcënuan bashkëshorten e tij, për t’i marrë 2 000 000 lekë. Kapen pas disa orësh, 5 shtetas që bashkëpunuan për kryerjen e këtij krimi.
Sekuestrohen 1 746 000 lekë nga shuma që bashkëshortja iu dha këtyre shtetasve.
Menjëherë pas informacioneve të siguruara nga inteligjenca policore, se më datë 29.04.2025, disa shtetas kishin marrë me forcë një shtetas, të cilin e kishin mbajtur peng dhe në këmbim të lirisë së tij i kishin marrë një shumë të madhe parash, specialistët e Sektorit për Hetimin e Krimeve të Rënda kanë organizuar punën për identifikimin dhe arrestimin e autorëve.
Si rezultat i veprimeve të shpejta dhe profesionale, të kryera në kuadër të operacionit “Imediat”, u arrestuan 5 shtetasit e dyshuar të implikuar në këtë rast, konkretisht: shtetasit S. S., 31 vjeç, K. S., 21 vjeç (vëllezër), I. M., 21 vjeç, B. I., 57 vjeç dhe N. B., 32 vjeçe, të gjithë banues në Tiranë.
Nga hetimet, pamjet filmike dhe provat e siguruara ka rezultuar se shtetasit S. S., K. S. dhe I. M., në rrugën “George Ë. Bush”, kanë marrë me forcë në një automjet dhe kanë mbajtur peng, në një banesë të braktisur të fshatit Kakunjë, shtetasin E. A., 68 vjeç. Dhe më pas kanë telefonuar bashkëshorten e tij, të cilën e kanë shantazhuar për jetën e 68-vjeçarit, duke i kërkuar shumën prej 2 000 000 lekësh. Kjo shumë i është dorëzuar shtetasit B. I., në zonën e Saukut.
Në vijim të veprimeve për zbardhjen e plotë të ngjarjes, janë kryer kontrolle në banesat e këtyre shtetasve si dhe në një automjet me të cilin lëviznin shtetasi S. S. dhe shtetasja N. B., ku u gjetën dhe sekuestruan 1 746 000 lekë të dyshuara të marra nëpërmjet kanosjes, nga bashkëshortja e shtetasit E. A.
Materialet procedurale iu referuan Prokurorisë së Tiranës, për veprime të mëtejshme.
