Real Madrid ka publikuar listën e të grumbulluarve për ndeshjen e kthimit ndaj Manchester Cityt, me disa rikthime shumë të rëndësishme për skuadrën spanjolle. Në listën e përzgjedhur nga Arbeloa janë përfshirë Kylian Mbappé, Jude Bellingham dhe Carreras, të cilët janë rikuperuar nga dëmtimet e tyre përkatëse dhe do të udhëtojnë me ekipin.
Prania e Mbappé ishte paralajmëruar edhe më herët, ndërsa klubi vazhdon të ndjekë nga afër gjendjen e tij fizike përpara ndeshjes. E njëjta situatë vlen edhe për Carreras, me stafin teknik që do të vlerësojë deri në fund gatishmërinë e tij për këtë takim. Ndërkohë, rikthimi i Jude Bellingham konsiderohet veçanërisht i rëndësishëm, pasi mesfushori anglez ka munguar në nëntë ndeshje që nga dueli i kampionatit ndaj Rayo Vallecanos në muajin shkurt.
Lista përfshin gjithashtu edhe disa emra nga akademia. Mario Rivas është një nga risitë në grupin e ekipit të parë, ndërsa Cestero rikthehet sërish mes të grumbulluarve, pasi kishte qenë edhe më parë pjesë e skuadrës. Në këtë mënyrë, Real Madridi vazhdon t’u japë hapësirë edhe talenteve të rinj, duke kombinuar eksperiencën me elementët premtues për një përballje të nivelit të lartë ndaj anglezëve.
Nga ana tjetër, Ferland Mendy mungon siç ishte parashikuar edhe në ditët e fundit, ndërsa mbetet në dyshim edhe për ndeshjen e fundjavës në kampionat ndaj Atletico Madridit. Në klub shpresojnë që mbrojtësi francez të jetë i gatshëm pas pushimit të kombëtareve. Jashtë listës ka mbetur edhe Yáñez, i cili u aktivizua fundjavën e kaluar ndaj Elches, ndërsa Asensio, që mungoi në momentet e fundit në atë takim, nuk do të jetë i disponueshëm as për këtë duel në Champions League.
Real Madridi shkon në këtë sfidë me moral të lartë edhe për shkak të rezultatit shumë të favorshëm të ndeshjes së parë, por rikthimi i disa prej lojtarëve kyç i jep skuadrës edhe më shumë siguri për një duel kaq të rëndësishëm në arenën europiane.
Të grumbulluarit e Real Madridit:
Portierë: Courtois, Lunin, Fran González
Mbrojtës: Carvajal, Alaba, Trent, Carreras, Fran García, Rüdiger, Huijsen, Diego Aguado, Mario Rivas
Mesfushorë: Bellingham, Camavinga, Valverde, Tchouameni, Güler, Cestero, Manuel Ángel, Palacios, Thiago
Sulmues: Vinicius, Mbappé, Gonzalo, Brahim, Mastantuono
