Gjashtëmbëdhjetë makina Tesla u shkatërruan gjatë natës nga flakët në Romë, një ngjarje që ka shkaktuar reagime të fuqishme nga pronari i kompanisë, Elon Musk. Ai reagoi në rrjetin social X (ish-Twitter) me një fjalë të thjeshtë: “Terrorizëm”. Musk u shpreh kështu pas lajmit të shpërndarë nga një përdorues në rrjetet sociale.
Sipas raportimeve të La Repubblica, zjarri shpërtheu gjatë natës mes së dielës dhe të hënës, më 1 mars, rreth orës 4:30. Flakët përfshinë makinën Tesla të parkuara pranë një pike karikimi dhe goditën edhe një tendë dhe pjesë të jashtme të zyrave të Tesla Center, një qendër e vetme e markës në Romë. Makinat u shkrinë plotësisht, ndërsa disa makina të tjera dhe showroom-i mbetën të paprekura, një detaj që mbështet hipotezën e një sulmi të qëllimshëm.
Policia italiane ka nisur hetimet për ngjarjen dhe po shqyrton mundësinë e një sulmi të organizuar nga një grup anarkist. Pamjet e kamerave të sigurisë po analizohen, pasi flakët shpërthyen në disa pika të ndryshme, një detaj që forcon dyshimet se zjarri mund të jetë shkaktuar qëllimisht.
Tesla ka konfirmuar incidentin dhe përmes një deklarate, përfaqësuesi i komunikimit në Itali, Marco Santini, tha: “Jemi të vetëdijshëm për incidentin në Romë dhe po e hetojmë. Po bashkëpunojmë me autoritetet lokale për të zbuluar shkaqet e ngjarjes.”
Reagimi i Musk ka marrë mbështetje edhe nga zëvendëskryeministri italian dhe lideri i Legës, Matteo Salvini, i cili ka shkruar në rrjetet sociale: “Dhuna, fyerjet, sulmet dhe zjarrvëniet. Ka shumë urrejtje të pajustifikuar ndaj Tesla-s. Kjo periudhë urrejtjeje dhe konflikti duhet të marrë fund.”
Zjarrfikësit arritën në vendngjarje me dy cisterna uji dhe raporton se flakët përhapen shumë shpejt dhe me intensitet të lartë, duke shkatërruar të gjithë automjetet. Makina të tjera në afërsi mbetën të paprekura, duke mbështetur më tej hipotezën e një sulmi të qëllimshëm. Ky incident do të ishte sulmi i parë ndaj Tesla-s në Itali, ndërsa ngjarje të ngjashme janë regjistruar edhe në Gjermani, Francë dhe Shtetet e Bashkuara.
Ky akt i shkatërrimit ka ndodhur pas disa incidenteve të tjera vandalizmi ndaj makinave Tesla në Romë gjatë dy muajve të fundit. Makinat e Musk janë shënjestruar me grafiti ku shkruhej “Fuck Elon Musk”, ndërsa disa incidente të tilla janë raportuar në lagje të ndryshme të kryeqytetit italian, përfshirë San Giovanni, qendër dhe Ostia.
Një tjetër zjarr i madh më 22 mars shkatërroi të paktën 30 makina Ford në një koncesionare në Castel Giubileo, ku flakët shpërthyen nga disa automjete hibride dhe shkatërruan gjithashtu zyrat dhe servisin e punishtes.
