Arjen Robben ka reaguar ndaj krahasimeve që po bëhen gjithnjë e më shpesh mes tij dhe Michael Olise, duke theksuar se nuk i pëlqen që lojtarët të vendosen në të njëjtën kornizë pa u vlerësuar për stilin e tyre individual.
Ish-ylli i Bayern Munich pranoi se është impresionuar nga paraqitjet e francezit, por nënvizoi se çdo futbollist duhet gjykuar për cilësitë e veta dhe jo për ngjashmëritë me emra të mëdhenj të së kaluarës.
Olise ka tërhequr vëmendje të madhe këtë sezon falë paraqitjeve të shkëlqyera në Bundesliga dhe Champions League, ndërsa shumë tifozë dhe analistë e kanë krahasuar me Robben për mënyrën si futet nga krahu i djathtë drejt qendrës. Në sezonin e tij të dytë te Bayern, 24-vjeçari ka regjistruar 17 gola dhe 29 asistime në të gjitha kompeticionet, duke u kthyer në një nga pikat më të forta të skuadrës bavareze.
Duke folur për faqen zyrtare të Bayern, Robben vlerësoi lart formën e Olise, por bëri edhe një paralajmërim të qartë.
“Isha shumë i impresionuar nga ai. Sigurisht, ajo është edhe zona ku kam luajtur unë. Ai ishte shumë i mirë, luajti në mënyrë aktive dhe kreative dhe pati disa prekje fantastike me topin. Sigurisht që ka disa paralele, por gjithmonë duhet pasur kujdes me krahasimet. Nuk më pëlqen shumë t’i bëj, sepse çdo lojtar ka stilin e tij të lojës”, u shpreh Robben.
Megjithatë, legjenda holandeze e bëri të qartë se e shijon shumë rritjen e Olise dhe ndikimin që ai po ka në ekipin bavarez.
“Sigurisht, ka disa gjëra që i kemi të përbashkëta. Por në fund ai është një lojtar ndryshe nga unë. Thjesht po bën një punë fantastike. Jam shumë i lumtur për këtë dhe mund ta shijoj vërtet”, shtoi ai.
Që prej transferimit nga Crystal Palace në vitin 2024, Olise është shndërruar në një element kyç të sulmit të Bayern, duke ndihmuar skuadrën të ruajë epërsinë në Bundesliga dhe të avancojë në fazat vendimtare të Kupës së Gjermanisë dhe Champions League.
Tashmë, bavarezët janë në fazën finale të sezonit dhe synojnë të mbrojnë dominimin e tyre në kampionat, ndërsa fokusi i menjëhershëm mbetet sfida e rëndësishme ndaj Real Madrid në kthimin e çerekfinales së Champions League.
