Rinumërimi i 338 kutive të votimit në qarkun e Tiranës, i nisur dy ditë më parë me vendim të dy anëtarëve të KAS-it, ka nxjerrë në pah parregullsi në favor të dy partive kryesore.
Të dhënat e deritanishme tregojnë se Partia Demokratike ka përfituar padrejtësisht 177 vota, ndërsa Partia Socialiste 170 vota në numërimin fillestar. Këto gjetje kanë qenë të papritura, veçanërisht për demokratët që kishin shpresuar në një përmbysje rezultati.
Edhe disa forca të tjera politike kanë rezultuar të favorizuara, ndonëse në përmasa më të vogla: Lëvizja Bashkë ka përfituar 15 vota më shumë nga sa i takonin, koalicioni “Nisma Shqipëria Bëhet” ka fituar padrejtësisht 20 vota, Partia Socialdemokrate (PSD) 18 vota dhe Partia Mundësia 3 vota.
Nga ana tjetër, disa parti janë dëmtuar në procesin e parë të numërimit: Partia e drejtuar nga Lulzim Basha ka humbur 15 vota, ndërsa koalicioni “Djathtas për Zhvillim” i Dashamir Shehit rezulton me 6 vota më pak nga sa i takonin.
