Declan Rice beson se Anglia aktuale është grupi më i mirë që kombëtarja ka pasur prej shumë kohësh, pavarësisht eliminimit të dhimbshëm në gjysmëfinale ndaj Argjentinës.
Pas fitores spektakolare 6-4 kundër Francës, që i siguroi “Tre Luanëve” medaljen e bronztë në Kupën e Botës, mesfushori anglez theksoi se skuadra duhet të jetë krenare për rrugëtimin e saj.
“Kjo është Anglia më e mirë prej shumë kohësh. Ky është fakt. Askush nuk mund të na e marrë këtë”, u shpreh Rice.
Fitorja ndaj Francës i dha Anglisë vendin e tretë në Botëror, rezultati më i mirë i kombëtares që prej triumfit historik të vitit 1966. Megjithatë, Rice pranoi se zhgënjimi për humbjen në gjysmëfinale mbetet i madh.
“Mendoj se mund të jemi krenarë si grup, por jemi shumë të zhgënjyer që humbëm në gjysmëfinale”, tha ai.
Mesfushori shtoi se Anglia është lodhur duke folur për krenari pas eliminimeve në gjysmëfinale apo çerekfinale, pasi objektivi i vërtetë mbetet fitimi i trofeve.
“Jemi lodhur duke thënë se jemi krenarë kur arrijmë në gjysmëfinale apo çerekfinale. Në fund, ne duam të fitojmë me Anglinë. Por të përfundosh i treti në këtë turne është një arritje e vërtetë”, deklaroi Rice.
Pavarësisht kritikave ndaj Thomas Tuchel pas mënyrës se si Anglia u eliminua ndaj Argjentinës, Rice beson se suksesi i madh është shumë pranë.
“Jemi shumë afër, sinqerisht. Është folur shumë për këtë grup në vitet e fundit, për eliminimet në turne, gjysmëfinale, çerekfinale, finale. Duhet të vazhdojmë. Mendoj se jemi afër”, shtoi ai.
Sipas Rice, diferencën në turne të tillë e bëjnë detajet e vogla, dhe Anglia e humbi finalen pikërisht për shkak të këtyre momenteve vendimtare.
“Është një lojë me diferenca të vogla. Ky është futbolli. Atë natë humbëm për detaje dhe për atë që ndodhi në zonat vendimtare”, përfundoi ai.
