Kryeministri në largim i Hungarisë, Viktor Orban, ka pranuar humbjen në zgjedhjet parlamentare, duke e cilësuar rezultatin si “të qartë dhe të dhimbshëm” në një fjalim drejtuar mbështetësve të tij.
Orban u shpreh se detyra e partisë së tij, Fidesz, tashmë është rindërtimi i komuniteteve dhe forcimi i opozitës.
“Ne nuk kemi më peshën e drejtimit të vendit, kështu që duhet të rindërtojmë komunitetet tona,” tha ai.
Orban falënderoi rreth 2.5 milionë votues që mbështetën Fidesz-in, duke premtuar se nuk do t’i zhgënjejë kurrë.
“Ne nuk dorëzohemi kurrë, këtë e dinë të gjithë për ne. Ditët në vijim janë për të shëruar plagët tona,” shtoi Orban.
Ndërkohë, Péter Magyar pritet të marrë postin e kryeministrit pas një fitoreje të thellë dhe befasuese në zgjedhje. 45-vjeçari, i cili dikur ishte aleat i afërt i Orban, ka arritur të përmbysë dominimin shumëvjeçar të Fidesz-it në politikën hungareze.
Magyar u interesua për politikën që në moshë të re dhe studioi drejtësi në një universitet katolik në Budapest. Ai iu bashkua Fidesz-it menjëherë pasi partia humbi pushtetin në vitin 2002 dhe për më shumë se dy dekada ishte një figurë e rëndësishme në prapaskenë, megjithëse pak i njohur për publikun e gjerë.
Kthesa e madhe në karrierën e tij erdhi në vitin 2024, kur ai u shkëput publikisht nga Fidesz pas një skandali abuzimi seksual që çoi në dorëheqjen e ish-bashkëshortes së tij, ish-ministre e drejtësisë. Ky moment shënoi fillimin e një kapitulli të ri politik për të.
Megjithëse vetë ka deklaruar se nuk kishte planifikuar të bëhej figurë kryesore politike, Magyar vendosi të krijojë një lëvizje të re politike nën siglën “Tisza”, për të sfiduar pushtetin e Fidesz-it. Ai e justifikoi këtë vendim me shqetësimet për korrupsionin dhe politikat që i konsideronte antidemokratike.
Gjatë dy viteve të fundit, ai ndërtoi një bazë të gjerë mbështetjeje, duke udhëtuar në qytete të vogla dhe fshatra, zona tradicionalisht pro Fidesz-it, dhe duke mbajtur deri në shtatë fjalime në ditë. Kjo strategji rezultoi vendimtare, pasi në zgjedhjet e fundit u përkthye në një fitore dërrmuese.
Rezultati shënon një ndryshim të madh në skenën politike të Hungarisë dhe hap një epokë të re nën drejtimin e Péter Magyar.
