Amazon, gjiganti i tregtisë elektronike, po planifikon një revolucion në vendin e punës, duke synuar të automatizojë operacionet e saj në SHBA. Sipas dokumenteve të siguruara nga The New York Times, kompania e themeluar nga Jeff Bezos do të zëvendësojë mbi gjysmë milioni punonjës me robotë brenda dekadës së ardhshme. La Repubblica raporton se drejtuesit e Amazon e shohin këtë si një “ndryshim historik”, që do të ulë ndjeshëm kostot e punës dhe do të rrisë efikasitetin në qendrat logjistike.
Plani parashikon që deri në 75% e impianteve të jenë të automatizuara, duke shmangur punësimin e rreth 160.000 punonjësve të rinj deri në vitin 2027. Amazon pritet të kursejë rreth 12.6 miliardë dollarë vetëm në periudhën 2025–2027, duke arritur të ulë kostot për çdo produkt të magazinuar apo dërguar me 30 cent. Menaxherët e kompanisë janë këshilluar të shmangin terma si “automatikë” ose “inteligjencë artificiale”, duke preferuar të flasin për “teknologji të avancuar” ose “cobot”, për të theksuar bashkëpunimin mes robotëve dhe njerëzve.
Pas publikimit të këtyre informacionit, Amazon ka reaguar, duke theksuar se dokumentet janë “të pjesshme dhe jo përfaqësuese të strategjisë së plotë të punësimit”. Zëdhënësja Kelly Nantel deklaroi se plani përmban mendimin e një grupi të brendshëm dhe se kompanisë i nevojiten 250.000 punonjës për festat e fundvitit, pa dhënë detaje mbi sa prej tyre do të kenë kontrata afatgjata.
Kritikët e kësaj qasje e shohin si një sinjal se automatizimi po përshpejtohet dhe se mijëra vende pune do të zëvendësohen me makineri në të ardhmen, një zhvillim që mund të riformësojë thellësisht tregun global të punës. Kjo situatë ka ngritur shqetësime mbi ndikimin e automatizimit në punësimin e njerëzve dhe mënyrën se si do të evoluojë tregu i punës në vitet e ardhshme.
