Lufta e udhëhequr nga Shtetet e Bashkuara kundër Iranit ka konsumuar më shumë raketa mbrojtëse Patriot në më pak se dy javë sesa Ukraina ka marrë gjatë katër viteve të luftës me Rusinë, sipas një analize të Bloomberg.
Që nga fillimi i konfliktit, Irani ka lëshuar më shumë se 2 mijë e 100 dronë sulmues dhe të paktën 688 raketa balistike, sipas të dhënave të analizuara nga agjencia.
Në përgjigje, SHBA dhe aleatët e saj kanë përdorur më shumë se 1 mijë interceptorë Patriot PAC-3, raketat e avancuara të sistemit të mbrojtjes ajrore që përdoren për të shkatërruar kërcënimet balistike.
Për krahasim, presidenti ukrainas Volodymyr Zelensky ka deklaruar se Ukraina ka marrë rreth 600 raketa PAC-3 që nga fillimi i pushtimit rus katër vite më parë – më pak se sa janë përdorur në rajonin e Gjirit gjatë 11 ditëve të fundit.
Rritja e përdorimit të interceptorëve ka krijuar presion mbi rezervat globale të sistemit Patriot dhe ka ngritur shqetësime për ritmin me të cilin mund të rimbushen këto stok.
Për Ukrainën, e cila mbështetet në sistemet Patriot për t’u mbrojtur nga raketat më të avancuara ruse, kjo situatë mund të nënkuptojë kufizime më të mëdha në furnizimet nga aleatët, përfshirë Shtetet e Bashkuara.
Autoritetet ukrainase kanë përdorur zakonisht bateritë Patriot për të interceptuar raketa balistike dhe lundruese të avancuara, përfshirë Kinzhal dhe Zircon hipersonike, armë që Moska kishte pretenduar më parë se nuk mund të ndaleshin.
Ndërkohë, Gjermania njoftoi më 10 mars se do t’i bashkohet disa vendeve evropiane për t’i dhënë Ukrainës 35 interceptorë shtesë.
