Tërmeti te Milan tashmë është zyrtar. Pas humbjes së rëndë ndaj Cagliari dhe dështimit për t’u kualifikuar në Champions League, klubi kuqezi ka vendosur të nisë një revolucion të madh në strukturën sportive.
Gerry Cardinale qëndroi në Milano pas ndeshjes dhe mori menjëherë vendimet e para të forta. Massimiliano Allegri, Giorgio Furlani, Igli Tare dhe Geoffrey Moncada nuk do të jenë më pjesë e Milanit.
Në komunikatën zyrtare të RedBird, sezoni është cilësuar si një “dështim i qartë”. Objektivi kryesor i klubit ishte rikthimi në Champions League dhe ndërtimi i bazave për një Milan të qëndrueshëm në majën e Serie A, por fundi i sezonit ndryshoi gjithçka.
Kuqezinjtë kishin qenë për një pjesë të gjatë të kampionatit në zonën e kreut, madje me mundësi për të luftuar për titullin. Megjithatë, rënia në javët e fundit dhe humbja ndaj Cagliari vulosën një sezon zhgënjyes.
Allegri largohet pas një kolapsi të plotë të skuadrës në fundin e sezonit, ndërsa Furlani, Tare dhe Moncada paguajnë çmimin e vendimeve sportive që nuk sollën rezultatet e pritshme.
Tashmë Milani pritet të nisë një riorganizim të thellë, me emërime të reja që do të bëhen të ditura sapo të finalizohen. Synimi i klubit është të ketë një strukturë të re gati për sezonin e ardhshëm.
