Përplasja me Gianni Infantinon mund ta çojë futbollin ndërkombëtar drejt një skenari të paprecedentë. Sipas “The Times”, UEFA, CONCACAF dhe Konfederata Aziatike po shqyrtojnë krijimin e turneve alternative ndaj FIFA-s, nëse presidenti aktual nuk largohet dhe kandidon për një tjetër mandat.
Një nga mundësitë është rikthimi i projektit “Global Nations League”, i hartuar fillimisht nga UEFA në vitin 2017. Në këtë format, Ligat e Kombeve të secilës konfederatë do të shërbenin si fazë kualifikuese.
Kombëtaret më të mira të çdo kontinenti do të kalonin më pas në shtatë turne të ndryshme, të ndara sipas renditjes ndërkombëtare. Çdo kompeticion do të kishte tetë skuadra dhe do të niste direkt nga çerekfinalet.
Në vend të një Botërori me 48 pjesëmarrës, do të organizoheshin shtatë “mini-Botërorë”, të menaxhuar nga konfederatat dhe jo nga FIFA.
Për momentin bëhet fjalë vetëm për një alternativë në shqyrtim, por ideja tregon se sa e thellë është bërë përplasja mes FIFA-s dhe konfederatave që kundërshtojnë Infantinon.
