Agjencia e lajmeve Reuters raporton se Hamasi ka pranuar armëpushimin 60-ditor në Gaza të propozuar nga SHBA, dhe marrëveshjen për lirimin e pengjeve, duke kërkuar disa ndryshime të vogla.
“Kjo është pozitive dhe duhet të ndihmojë në arritjen e një marrëveshjeje”, ka deklaruar një zyrtar palestinez i njohur me bisedimet për Reuters
Plani i marrëveshjes u miratua këtë javë edhe nga ministri izraelit për Çështjet Strategjike, Ron Dermer, gjatë vizitës së tij në Uashington.
Sipas planit të armëpushimit, të raportuar edhe nga gazeta izraelite Haaretz, tetë pengje të gjalla do të lirohen ditën e parë të ndalimit të luftimeve, ndërsa dy të tjerë do të lirohen në ditën e 50-të.
Plani përfshin gjithashtu një kthim të fazuar të trupave të pengjeve izraelitë që kanë humbur jetën: pesë trupa në ditën e shtatë të armëpushimit, pesë të tjera në ditën e 30-të dhe tetë të fundit në ditën e 60-të.
Në total, sipas këtij plani, do të lirohen 10 pengje të gjalla dhe do të kthehen trupat e 18 të tjerëve.
Marrëveshja, e hartuar nga Katari, bazohet në të ashtuquajturin “korniza Witkoff”, e propozuar nga i dërguari amerikan, Steve Witkoff.
Reuters shkruan se grupi i Hamasit dëshiron garanci se negociatat për t’i dhënë fund luftës do të zhvillohen gjatë armëpushimit 60-ditor dhe se armëpushimi do të zgjatet nëse është e nevojshme, derisa të dyja palët të arrijnë marrëveshje.
Po ashtu, Hamasi dëshiron që Kombet e Bashkuara të përfshihen përsëri në ofrimin e ndihmës, që të sigurojë përmbushjen e nevojave humanitare, duke përfshirë funksionimin e furrave të bukës, dhe që Izraeli të mos e kufizojë atë ose ta përdorë si levë ndikimi gjatë bisedimeve.
