Banorët e fshatit Rrjoll në Velipojë janë përplasur me policinë, gjatë protestës kundër ndërtimit të një resorti turistik në zonë, që ata pretendojnë se po ndërtohet në tokat e tyre.
Protestuesit kanë tentuar të bllokojnë rrugën Shëngjin–Velipojë si formë proteste, pas rikthimit të fadromave dhe makinerive për ndërtimin e resortit.
Banorët pretendojnë se po iu vidhet prona dhe theksojnë se fillimi i punimeve është i paligjshëm, pasi konflikti mbi pronësinë është ende në proces gjyqësor.
Ndërkohë, në mars të vitit të kaluar, banorët depozituan gjithashtu një padi në SPAK kundër këtij ndërtimi.
Projekti për ndërtimin e një fshati turistik që përfshin vila dhe hotele luksoze i është dhënë biznesmenit Bashkim Ulaj dhe shtrihet në kufirin mes Ranës së Hedhun dhe zonës Baks–Rrjoll.
Banorët shprehen se kjo situatë është e pakuptimtë dhe se do t’i vazhdojnë protestat, duke e akuzuar ndërtuesin dhe botuesin Bashkim Ulaj se u ka grabitur tokat. Gjatë protestës se sotme disa banorë janë shoqëruar nga Policia e Shkodrës, ndërsa nuk kanë munguar as përplasjet fizike mes tyre dhe efektivëve.
Përfaqësues të rreth 60 familjeve protestuan edhe ditën e hënë. Ata thonë se toka u është grabitur me dokumentacione të falsifikuara. Gjatë protestës policia shoqëroi disa persona.
