Barcelona ka mposhtur Atletico Madrid dhe ka dhënë një sinjal shumë të fortë në garën për titullin në La Liga. Pas suksesit në “Metropolitano”, skuadra e drejtuar nga Hansi Flick ka përfituar edhe nga humbja zhgënjyese e Real Madrid ndaj Mallorca, duke bërë që debati për kampionatin të ndizet menjëherë në emisionin “Carrusel Deportivo”.
Megjithatë, jo gjithçka ishte pozitive për Barcelona. Marc Bernal dhe Araujo dolën me probleme fizike, me mesfushorin që pritet t’i nënshtrohet testeve mjekësore për një shqetësim në kyçin e këmbës. Sa i takon Araujo, uruguaiani luajti për rreth gjysmë ore me shqetësime përpara se të zëvendësohej. Jordi Martí u ndal te ky aspekt, duke thënë se është i shqetësuar për dëmtimet dhe për rrezikun që ato mund të sjellin në këtë moment vendimtar të sezonit.
Në diskutimin nëse La Liga tashmë është e mbyllur, shumica e analistëve ranë dakord se Barcelona e ka titullin shumë pranë. Santi Ovalle ishte edhe më i prerë: “Jo vetëm e vendosur. Plotësisht e vendosur.” Chazarri ndau të njëjtin mendim, por theksoi se kjo vjen më shumë nga problemet e Real Madrid sesa nga shkëlqimi i Barcelona: “Real Madrid po luante për kampionatin dhe zhvilloi një ndeshje shumë të dobët. Ata nuk mund t’i rikuperojnë 7 pikë në fushë.”
Nga ana tjetër, Lluis Flaquer vlerësoi punën e bërë nga Barcelona, duke kujtuar se kur Flick mori drejtimin, Real Madrid ishte kampione e Europës dhe sapo kishte afruar Mbappe, ndaj shumëkush priste një dominim absolut të madrilenëve. Sipas tij, Barcelona jo vetëm që po ia mohon titullin rivalit të madh, por po e vë sërish në pozitë të vështirë edhe në aspektin e trofeve. Ndërkohë, Marcos López dha një mendim ndryshe, duke deklaruar se Barcelona nuk është aq e fortë sa duket dhe se suksesi aktual lidhet më shumë me paqëndrueshmërinë e Real Madrid sesa me ndonjë superioritet absolut të skuadrës katalanase.
Një tjetër temë që tërhoqi vëmendje ishte edhe zemërimi i Lamine Yamal gjatë dhe pas ndeshjes. Talenti i Barcelona nuk festoi golin e Lewandowski dhe u drejtua menjëherë për në dhomat e zhveshjes pas vërshëllimës finale, pa përshëndetur Hansi Flick. Santi Ovalle mendon se zemërimi i tij nuk kishte lidhje me trajnerin, por me një aksion që nuk shkoi siç donte ai. Ndërsa Pablo Pinto, i cili ishte shumë pranë lojtarëve, insistoi se pakënaqësia e Yamal kishte nisur më herët dhe se gjestet e tij ishin të drejtuara nga stoli ku ndodheshin lojtarët e Barcelona.
