Real Madrid ka bërë publik raportin mjekësor për Ferland Mendy, i cili pësoi dëmtim në ndeshjen ndaj Manchester City dhe u zëvendësua në pushimin mes pjesëve. Mbrojtësi francez kishte shfaqur shqetësime fizike gjatë sfidës në “Santiago Bernabéu”, ndërsa ekzaminimet kanë konfirmuar një dëmtim muskulor në pjesën e pasme të kofshës së djathtë.
Sipas klubit madrilen, gjendja e lojtarit do të monitorohet në ditët në vijim, por ai do të mungojë në ndeshjen e kthimit ndaj Manchester City në “Etihad”, ashtu siç ishte parashikuar. Për më tepër, Mendy është në dyshim serioz edhe për derbin ndaj Atlético Madrid, çka do të thotë se rikthimi i tij mund të shtyhet deri pas ndeshjeve të kombëtareve.
Mendy e nisi si titullar sfidën ndaj City dhe zhvilloi një paraqitje shumë të mirë, duke mbyllur hapësirat për lojtarë si Savinho dhe Semenyo. Megjithatë, problemet fizike u rikthyen sërish dhe Arbeloa u detyrua ta zëvendësonte me Fran García në fillim të pjesës së dytë.
Pas ndeshjes, trajneri i Real Madrid kishte lënë të kuptohej se situata nuk dukej aspak pozitive. “Po, është dëmtuar. Nuk duket mirë. E vlerësoj shumë përpjekjen e tij, sepse po merrnim një rrezik duke e aktivizuar në dy ndeshje radhazi pas një kohe të gjatë mungese. Mora këtë rrezik dhe i jam mirënjohës për këtë”, ishte deklarata e Arbeloas.
Ky dëmtim përbën një tjetër problem për Real Madrid në një moment shumë të rëndësishëm të sezonit, kur skuadra po lufton në Champions League dhe në ndeshjet vendimtare të kampionatit.
