Real Madrid ka ruajtur ecurinë 100% fitore në nisjen e sezonit 2025/26 të La Ligas, duke mundur Mallorcën 2-1 në “Santiago Bernabeu”.
Skuadra e Xabi Alonsos, që ka nisur mbarë aventurën e re në pankinën e madrilenëve, fitoi pavarësisht dyshimeve për shkak të përgatitjeve të shkurtra verore. Pas suksesit minimal ndaj Osasunës dhe fitores së pastër kundër Real Oviedos, “Los Blancos” siguruan tre pikë të tjera edhe në kthimin para tifozëve të tyre.
Ndeshja nuk nisi mirë për vendasit. Një gol i hershëm i Kylian Mbappé u anulua nga VAR-i, ndërsa Vedat Muriqi kaloi Mallorcën në avantazh. Megjithatë, reagimi i Realit erdhi shpejt. Arda Guler barazoi pas një aksioni të kombinuar, ndërsa Vinicius Junior me një depërtim tipik dhe goditje të saktë vulosi përmbysjen para pushimit.
Me këtë fitore, Real Madrid e mbyll gushtin me tre fitore në po aq ndeshje, duke treguar se mbetet kandidati kryesor për titullin.
