Real Madrid ka paralajmëruar një padi shumëmilionëshe ndaj UEFA-s, pasi Gjykata Provinciale e Madridit hodhi poshtë ankesat e UEFA-s, Federatës Spanjolle (RFEF) dhe LaLigës në lidhje me vendimin që konfirmon se organet drejtuese të futbollit kanë abuzuar me pozicionin dominues për çështjen e Superligës Evropiane.
Në një deklaratë zyrtare, klubi i drejtuar nga Florentino Pérez e cilësoi vendimin si një fitore historike për lirinë e konkurrencës, duke theksuar se UEFA dhe FIFA kanë shkelur rregullat e Bashkimit Europian, sipas vendimit të Gjykatës së Drejtësisë së BE-së (CJEU).
“Ky vendim hap rrugën për të kërkuar kompensimin për dëmet e mëdha të pësuara nga klubi,” – thuhet në njoftimin e Real Madridit.
Klubi gjithashtu zbuloi se gjatë vitit 2025 ka zhvilluar bisedime të shumta me UEFA-n për të gjetur zgjidhje mbi qeverisjen e futbollit, transparencën financiare, mbrojtjen e shëndetit të lojtarëve dhe përmirësimin e përvojës së tifozëve, përfshirë edhe modele transmetimi falas dhe globale, si në rastin e Kupës së Botës për Klube — por pa arritur në asnjë marrëveshje.
Real Madrid konfirmon se do të vazhdojë betejën ligjore dhe punën për “të mirën e futbollit botëror dhe tifozëve”, duke kërkuar dëmshpërblim të konsiderueshëm nga UEFA.
