Real Madrid ka përgatitur prej muajsh një dosje për çështjen Negreira dhe ajo tashmë raportohet se është nisur drejt zyrave të UEFA-s.
Sipas raportimeve nga Spanja, klubi madrilen nuk kërkon vetëm një ndëshkim sportiv ndaj Barcelona, që mund të përfshijë përjashtimin nga kompeticionet evropiane, por shkon edhe më tej: kërkon që titujt e fituar nga katalanasit gjatë asaj periudhe të hiqen nga historia zyrtare e klubit.
Gjatë fushatës zgjedhore te Real Madrid, Florentino Pérez e ka pasur një nga objektivat kryesore ndjekjen e kësaj çështjeje. Takimet dhe fotot e tij me Gianni Infantino dhe Aleksander Ceferin janë parë si pjesë e një lëvizjeje më të gjerë për të forcuar pozicionin e klubit madrilen në këtë betejë sportive dhe institucionale.
Raporti i përgatitur nga Real Madrid pritet të shqyrtohet nga UEFA, e cila nuk e ka mbyllur përfundimisht dosjen për çështjen Negreira. Në Valdebebas besojnë se dokumentet dhe argumentet e paraqitura janë të mjaftueshme për të kërkuar një reagim të fortë nga institucioni më i lartë i futbollit evropian.
Për Real Madrid, kjo nuk është vetëm një çështje rivaliteti me Barcelona, por lidhet me integritetin e garës dhe me nevojën që meritokracia sportive të mbrohet në mënyrë të qartë.
Tani mbetet për t’u parë se çfarë qëndrimi do të mbajë UEFA ndaj kërkesës së klubit madrilen dhe nëse dosja e Real Madrid do të sjellë pasoja konkrete për Barcelona.
