Real Madrid dhe Manchester City duket se nuk do të ndeshen vetëm në Champions League, por një betejë e fortë mes dy klubeve do jetë edhe në merkaton e ardhshme të verës.
“Los Blancos” dhe “Qytetarët” kanë objektiv të përbashkët transferimin e Theo Hernandez. Kontrata e francezit me Milan skadon në verën e vitit 2026 dhe deri tani nuk ka “sinjale” rinovimi, ndaj kuqezinjtë mund të lejojnë largimin e tij në verë për një shifër të mirë ekonomike, që mos të largohet një vit më pas si lojtar i lirë.
Për Hernandez do ishte një rikthim te Real-i, pas dy sezonesh 2017-2019, por atëherë ai nuk arriti të fitonte një vend titullari. Objektivi i parë i “Los Blancos” për krahun e majtë ka qenë Alphonso Davies, por kanadezi rinovoi këtë javë me Bayern dhe kjo pistë bie poshtë, ndaj Hernandez është një alternativë që duhet ndjekur.
Po ashtu francezi është futur dhe në listën e gjatë të Guardiolës për merkaton e verës, pasi mesa duket 220 milionë eurot e shpenzuara në janar nuk i mjaftojnë teknikut spanjoll.
Gjithsesi, duket e vështirë që Milan të heq dorë nga një prej lojtarëve më të mirë që ka, por duhet theksuar që marrëdhëniet mes klubit dhe lojtarit nuk janë në ditët e tyre më të mira.
