Raphinha po kalon një moment të vështirë, si në fushë ashtu edhe jashtë saj. Një tjetër dëmtim muskulor e ka lënë jashtë në mes të Kupës së Botës, ndërsa së fundmi emri i tij është përfshirë edhe në një polemikë financiare.
Sipas deklaratave të ish-futbollistit brazilian Vampeta, Raphinha është në vështirësi serioze financiare dhe për këtë arsye po mendon mundësinë e një transferimi te Al Hilal në Arabinë Saudite, për të përmirësuar situatën ekonomike. Deklarata e tij shkaktoi shumë zhurmë në Brazil, edhe pse vetë Vampeta dukej se u pendua pasi e bëri publike këtë informacion.
Çështja lidhet me babain e lojtarit, Rafael Belloli, i cili më herët kujdesej për interesat e tij. Sipas zërave të raportuar, marrëdhënia mes tyre është përkeqësuar, pasi babai i Raphinhas dyshohet se mbante një pjesë shumë të madhe të të drejtave të imazhit të futbollistit.
Pas kësaj situate, menaxhimi i karrierës së lojtarit thuhet se ka kaluar te vjehrri i tij, Alexandre Madeira, agjent i FIFA-s. Ky ndryshim erdhi edhe pasi Raphinha u detyrua të largohej nga menaxhimi i Deco, për shkak se ky i fundit mori rolin e drejtorit teknik te Barcelona.
Megjithatë, familja e Raphinhas ka mohuar gjithçka. Fillimisht reagoi vëllai i lojtarit, i cili tha se Vampeta do të duhet të shpjegojë “të gjitha këto gënjeshtra”. Më pas foli edhe nëna e tij, Lisiane, ndërsa bashkëshortja e futbollistit, Natalia Rodrigues Belloli, mohoi kategorikisht çdo problem financiar.
“Është gjithçka absurde. Nëse do të kishim vetëm 10% të asaj që fiton Raphinha, do të ishim të pasur”, u shpreh ajo, duke hedhur poshtë edhe zërat për probleme mes lojtarit dhe babait të tij.
Për momentin, Raphinha kërkon qetësi dhe rikuperim sa më të shpejtë. Edhe Carlo Ancelotti shpreson ta ketë sërish në dispozicion lojtarin e Barcelonës, edhe pse rikthimi i tij nuk pritet për ndeshjen ndaj Japonisë.
