Kryeministri Edi Rama, në takimin me kryetarët e bashkive, tha se në fokus kryesor janë hapat e mëtejshëm lidhur me një projekt për të mbështetur pushtetin vendor.
Gjithashtu, Rama nënvizoi se një pikë e rëndësishme në planin e punës është angazhimi maksimal për legalizimet ku tha se në bashkëpunim me çdo bashki do të ndërtohen planet për legalizimet dhe do të përcaktohen zonat prioritare
Ai kërkoi që në bashki të hapen zyra juridike për të ndihmuar qytetarët për problemet me kadastrën, të cilat do të lehtësonin aplikimet.
“Kadastra, në bashkëpunim me çdo bashki, por këtu duhet angazhimi juaj, të ndërtojë planet prioritare të legalizimit. Në mënyrë që të legalizojmë procesin dhe ta bëjmë më të drejtë e transparent për aplikuesit, duke vendosur një sistem ku ata që kanë aplikuar më parë janë të parët për të marrë përgjigje, po ashtu edhe përcaktimi i zonave prioritare. Të kemi një punë të përbashkët dhe të koordinuar më të mirë. Duhet patjetër që bashkitë të hapin një zyrë të ndihmës juridike për kadastrën. Ka shumë ankesa për kadastrën, por shumë prej tyre vijnë nga moskryerja e aplikimit në mënyrë të rregullt ligjore. Nuk ka asnjë problem që bashkitë të hapin një zyrë të ndihmës juridike enkas për shërbimin e kadastrës dhe legalizimeve. Është diçka që do të lehtësojë maksimalisht qytetarët në mënyrën e kuptimit sesi bëhet një legalizim. Këtë do ta ndjekë ministri i Pushtetit Vendor”, tha Edi Rama”, tha ai.
