Kryeministri Edi Rama ka folur për rrezikun që fenomeni i Tik Tok ka shkaktuar tek adoleshentët, gjatë fjalës së tij në shkollën “Halit Çoka” në Kamëz. Ai theksoi se Tik Tok duhet të merret nën kontroll, pasi bazohet në një algoritëm që stimulon sjellje dhe përmbajtje negative.
Rama shtoi se rrjeti social Tik Tok ka ndikuar negativisht tek fëmijët dhe adoleshentët, duke krijuar një “shok të keq” për ta. Sipas tij, Tik Tok nuk ka filtra të duhur për të dalluar fëmijët nga të rriturit, duke i hapur mundësinë për të shpërndarë përmbajtje të dëmshme, pa kontroll të duhur. “Ky rrjet duhet të merret nën kontroll, së paku për personat nën 16 vjeç,” tha Rama.
Kryeministri gjithashtu vuri theksin tek bashkëpunimi mes shkollave, prindërve dhe mësuesve, duke deklaruar se, ndonëse bllokimi i Tik Tok mund të ndihmojë, kjo nuk është një zgjidhje afatgjatë. Ai e krahasoi ndikimin e Tik Tok me atë të një droge, duke e cilësuar si një faktor që stimulon sjellje të rënda dhe të dëmshme për fëmijët.
