Kryeministri Edi Rama, nga Fieri, mbajti fjalën e tij në kuadër të programit Punë për Shqipërinë, sot në 11 prill. Akuzoi opozitën se merret me fabrikime dhe thashetheme.
“Partia Socialiste është e vetmja forcë politike, e cila do ta anëtarësojë Shqipërinë në Bashkimin Europian. Kundër nesh hidhet baltë, sikundër dhe ndaj vendit tonë. Ne jemi pranë atyre njerëzve që punojnë, që shërbejnë dhe kështu me radhë. Ne duhet t’i japim jetë organizatës së Partisë Socialiste. Janë bërë shumë punë dhe janë arritur shumë rezultate. Sot ne, duke qenë se ekonomia është rritur, kemi mundësi që të indeksojmë pagat dhe pensionet. Sot njihet vjetërsia e punës. Kur kemi marrë detyrën, pensioni mesatar ka qenë 86 euro. Kaq është shtesa që ne japim. Ne do vazhdojmë rritjen e pagave dhe pensioneve. Kjo ka ardhur për shkak të rritjes ekonomike. Rritje pensioni do ketë çdo vit”, tha Rama.
Foli dhe për korrupsionin, duke thënë se matjet bëhen me perceptim.
“Flasin për korrupsionin, duke thënë se është rritur si asnjëherë më parë. Si ka mundësi që korrupsioni qenka rritur “ku nuk mban” sipas tyre e ndërkohë rriten pagat, rriten pensionet, rriten investimet. Investimet e huaja ishin 400 milionë euro në vit dhe shkuan në 1.6 miliardë vitin e kaluar. Si ka mundësi që të ardhurat në buxhetin e shtetit janë rritur? Kur rritet korrupsioni, duhet të ulen këto? Nuk është e mundur ndryshe. Ne po marrim rezultate të punëve që kemi bërë dhe të bazave që kemi vendosur. Nëse sot jemi pranë anëtarësimit të BE-së, ndodh për shkak të rezultateve”, deklaroi Rama.
Komentoi edhe Prokurimet Publike. Sipas tij, PPP-të në Shqipëri janë në standardet e mesatares së BE-së dhe në disa raste edhe më lart se vetë vendet e BE-së.
“Prokurimet Publike, që flitet kaq shumë dhe ku ekzistojnë gjasat të vidhet më shumë, në fakt, sipas të huajve, rezulton se janë një proces tepër i suksesshëm. Drejtësia do veprojë, por në Shqipëri nuk e bën ligjin korrupsionin dhe nuk dikton korrupsioni. Mund të përballem me këdo, por me fakte, jo me perceptime dhe me gjyqe publike, se ashtu është e vështirë që t’ia dalësh. Me perceptime është e vështirë t’ja dalësh, sepse ka interesa, ka këndvështrime. Ata që na ndjekim mbrapa, natyrisht që ndihen më keq dhe gjejnë arsye në hava se përse fitojmë ne 83 mandate. Sa më shumë ata akuzojnë, aq më shumë ne fitojmë”, u shpreh Rama.
