Në episodin e sotëm të podkastit “Flasim”, kreu i qeverisë, Edi Rama kishte të ftuar skiatoren italiane, Lara Colturi, përfaqësuesen e Shqipërisë në Kampionatin Botëror të Skive. Colturi u rendit e dyta në kapmionat pas numrit 1 të botës Mikaela Schifrin.
Kreu i qeverisë, e ka cilësuar 18-vjeçaren italiane si “Princesha e dëborës”, ndërsa e ka ftuar të vizitojë malet e vendit tonë.
“Vetëm 18 vjeç, por vjen nga majat me dëborë të botës. Lara Colturi, një italiane e lindur dhe rritur në Itali që ka vendosur të bëhet shqiptare, të vërë flamurin e Shqipërisë në gjoks dhe të garojë për Shqipërinë në ski. Edhe pse është shumë e re i ka sjellë shenjat e para të sigurta që shumë shpejt do ta shohim flamurin shqiptar të ngrihet mbi të gjithë në një disiplinë që për Shqipërinë është krejt e re, por falë Larës dhe nënës së saj mund të jetë një nga disiplinat e së ardhmes”, tha Rama duke prezantuar Lara Colturi-n.
“Jam i lumtur që të kisha këtu dhe jam një adhurues i yti. Uroj të arrish të gjitha majat e botës”, u shpreh kryeministri.
Ndërsa skiatorja Lara Colturi tha se “e morëm këtë vendim së bashku me prindërit”, pasi panë mundësinë për të qenë bashkë me familjen në pistë.
“Isha kategorinë e moshës 12-13-14 vjeç, kisha fituar të gjitha garat dhe menduam se ndërmarrja e një hapi të tillë do të mundësonte hapjen e të gjitha rrugëve drejt renditjes në vendet e para në e për të përjetuar atë çka po përjetoj tani, ëndrrën time së bashku me prindërit e mi duke u argëtuar gjithashtu”, u shpreh ajo.
Pjesë nga intervista:
Edi Rama: Po malet shqiptare i njeh?
Lara Colturi: Kam parë disa! Por, më kanë thënë se keni male të mbuluara me dëborë dhe se keni shumë projekte. Do të ishte diçka e mrekullueshme nëse do të stërvitesha në ato male.
Edi Rama: Por duhet të flasësh me ato male e t’i dëgjosh ato, sepse kemi male shumë të bukura. Pastaj, tashmë është vendi yt.
Lara Colturi: Po, e vërtetë. Do të doja të kaloja më shumë kohë.
Edi Rama: Një gjë është e sigurt, do bëhesh çfarë të duash, por një gjëje nuk do t’i shpëtosh dot. Si kampione do të jesh gjenerale apo kolonele e ushtrisë shqiptare.
Lara Colturi: Mirë, të shohim se si do të jetë e ardhmja.
Edi Rama: Kjo do të ndjekë për gjithë jetën. Të uroj shumë suksese, gjithçka që ëndërron. Jam i lumtur që të kisha këtu dhe jam një adhurues i yti. Uroj të arrish të gjitha majat e botës. Të presim të kalosh pushimet në vendin tënd të dytë.
Skiatorja që përfaqëson Shqipërinë u rendit e dyta në garën e Sllalomit vetëm 55 të qindtat pas kampiones amerikane Mikaela Shiffrin, e cila mban numrin rekord të 99 garave të fituara në Kupën e Botës.
