Gjatë një bashkëbisedimi me të rinjtë dhe studentët, ku foli për ecurinë e procesit të negociatave të Shqipërisë në Bashkimin Europian, kreu i qeverisë, Edi Rama, u ndal edhe te korrupsioni. Ai tha se sot korrupsioni në Shqipëri është më shumë perceptim se sa realitet.
Rama theksoi se institucionet shqiptare janë në proces formimi dhe përpjekjet e qeverisë po i çojnë drejt digjitalizimit të shërbimeve dhe prokurimeve publike, duke reduktuar korrupsionin dhe duke rritur konkurrencën mes kompanive që përfitojnë fonde publike. Ai shtoi se këto reforma synojnë që qytetarët të marrin shërbimet pa “bakshish” dhe pa pengesa, duke e bërë korrupsionin një problem të zvogëluar.
Rama: Unë mendoj që korrupsioni në Shqipëri sot është shumë më i madh në perceptim se sa në realitet. Jo se në realitet korrupsioni nuk është problem, korrupsioni është problem për arysen se institucionet janë akoma në formësim. Njerëzit shpesh e ngatërrojnë korrupsionin me persona të këqij që duhen marrë dhe duhen çuar në ferr dhe ne do shpëtojmë. Jo! Patjetër që ata të cilët kapen duke bërë korrupsion duhen dënuar, por vetëm kjo nuk e çliron një vend nga korrupsioni, që një vend të çlirohet nga korrupsioni, duhet që korrupsioni të mos jetë një shërbim alternativ i suksseshëm.
Shërbimet që njerëzit kërkojnë t’ia garantojnë institucionet. Pse paguajnë? Sepse nuk arrijnë dot ta marrin atë që kërkojnë dhe u takon pa u paguar. Sot shqiptarët nuk janë të detyruar të paguajnë bakshish për të marrë 1000 shërbime që i marrin përmes e-Albania. Vijmë të korrupsioni i një niveli më të lartë, prokurimet e fondeve publike. Ky ka qenë një tjetër problem i madh. Sot është një problem, por është një problem më i vogël. Pse? Sepse ne kemi bërë një punë madhore me digjitalizimin e prokurimeve, këtë e thotë BE. Pavarësisht se nënvizon që ne duhet të bëjmë ende në këtë aspekt. Puna madhore ka bërë që po të shikoni numrin e kompanive që përfitojnë nga fondet publike është më e madhe se sa ka qenë në të shkuarën. Kjo do të thotë që ka më shumë konkurrencë.
